Jer silkinisi bolǵan aımaqtaǵy 1 mıllıon 116 myń turǵyn basqa qalalardy panalaǵan
Qazirgi tańda 205 myń 454 adam el astanasy Ankaraǵa, 154 myń 86 adam Antaláǵa kelgen. Tipti jer silkinisi sezilgen Mersın qalasyn 65 myń, al Elazyǵty 50 myń adam panalaǵan, dep habarlaıdy Almaty-akshamy.kz inbusiness.kz-ke silteme jasap.
Túrkıanyń 11 qalasyn qamtyǵan 7,7 jáne 7,6 baldyq jer silkinisinen keıin turǵyndar áýe, qurlyq jáne teńiz joldary arqyly basqa qalalarǵa ketti. Olar sondaǵy qonaqúılerge, jastar jáne sport mınıstrligine qarasty jataqhanalarǵa, sondaı-aq esigin ashqan erikti otbasylaryna jaıǵasty.
Jer silkinisinen aman qalǵan 1 mıllıon 116 myń 40 turǵyn basqa qalalarǵa evakýasıalandy. Tıisti mekemeler men uıymdar olardy azyq-túlik jáne kıim-keshekpen qamtamasyz etip jatyr. Al zardap shekken eresekter men balalarǵa psıhoáleýmettik qoldaý kórsetý múmkindikteri de qarastyrylǵan.
Jergilikti ákimdikterden alynǵan málimetter boıynsha zardap shekkenderdiń kóbisi Ankara qalasyn panalaǵan. Jer silkinisi aımaǵynan astanaǵa kelgenderdiń 200 myńnan astamy ákimdiktiń uıymdastyrýymen qonaqúılerge, demalys oryndaryna, jastar ortalyqtaryna, jataqhanalarǵa, jáne úılerge ornalastyryldy. Al 154 myńnan astamy Antalány tańdaǵan. Qaladaǵy qonaqúılerde, páterlerde jáne jataqhanalarda 73 myńdaı zardap shegýshi ornalasqan. 12 myńy jataqhanada, 4 myńy qonaq úılerde. 64 myńnan astamy óz qarajatymen jalǵa alǵan nemese tanystarynyń úıinde turyp jatyr.
Jer silkinisiniń áseri sezilgen qalalardyń biri - Mersın. Soǵan qaramastan bul shaharǵa alǵashqy kúnnen bastap apat aımaǵynan myńdaǵan adam kelgen. Qazir 65 myń 496 adamnyń baspana jáne basqa da qajettilikteri ákimdikter tarapynan qamtamasyz etildi. Zilzaladan zardap shekken Elazyǵ qalasy da kelýshilerge esigin aıqara ashty. Qalaǵa Malatá, Adyıaman jáne Qahramanmarashtan kelgen 50 myń jer silkinisi qurbany jataqhanalardy, qonaq úılerdi jáne týystarynyń baspanasynda turyp jatyr. Sonymen qatar apattan zardap shekkender budan basqa Koná, Qaıseri, Býrsa sekildi birneshe qalany panalaýda.
Adyıaman qalasyna baryp, shatyrda turyp jatqan turǵyndarmen kezdesken Erdoǵan halyqty qalalaryn tastap ketpeýge shaqyrdy:
"Basqa shaharlarǵa ketip jatqan azamattarǵa aıtarym: óz qalańyzǵa ıe bolyńyz, mekenińizdi tastap ketpeńiz. Sizderge jańa qala turǵyzyp beremiz. Qıraǵan ár úıdi jańadan salamyz. Búlingen zaýyt pen kásiporyndy qalpyna keltiremiz. Árbir qalaǵa budan da qarqyndy ekonomıka, týrızm, jáne belsendi áleýmettik ómir syılaımyz. Biz jarqyn bolashaqty ornatýǵa bel býdyq. Men sizderden bir jyl suraımyn", - dedi Prezıdent.