Memleket basshysyna «QazMunaıGaz» UK» aksıonerlik qoǵamynyń byltyrǵy óndiristik jumystarynyń negizgi qorytyndysy týraly esep berilip, aldaǵy kezeńge arnalǵan jospary tanystyryldy, dep habarlaıdy Almaty-akshamy.kz.
Berilgen málimetke sáıkes, kompanıa kómirsýtekterdi óndirý, óńdeý jáne tasymaldaý boıynsha belgilengen kórsetkishterge qol jetkizdi. Bıyl «QazMunaıGaz» 23 mıllıon tonnadan astam munaı óndirýdi josparlap otyr.
Prezıdentke Ózen ken ornyn ońaltý jóninde de esep berildi. Bul jobanyń ekonomıkalyq qana emes, sondaı-aq áleýmettik mańyzy bar.
Budan bólek, Maǵzum Myrzaǵalıev kompanıanyń geologıalyq qorlaryn ulǵaıtý perspektıvalary týraly baıandady. Onyń aıtýynsha, búginde perspektıvti jańa jobalarǵa ınvestısıa belsendi túrde tartylyp jatyr.
Memleket basshysyna «jasyl jobalardy» damytý jóninde bergen tapsyrmasynyń oryndalý barysy týraly málimet berildi.
«QazMunaıGaz» basshysy kompanıanyń kásiporyndary ornalasqan óńirlerde halyqty sapaly aýyzsýmen qamtamasyz etýge baǵyttalǵan jobalardyń júzege asyrylý barysy týraly aıtty.
Kezdesý sońynda Qasym-Jomart Toqaev ınvestısıalyq jobalardy iske asyrýǵa qatysty birqatar tapsyrma berdi. Sondaı-aq qazaqstandyq munaı óńdeý zaýyttarynyń, ásirese kóktemgi egis jumystary qarsańynda úzdiksiz jumys isteýin qamtamasyz etý qajettigine erekshe nazar aýdardy.