Qazaqstan azamatyna Ystanbulda bolǵan qaqtyǵys kezinde oq tıdi.
Bul týraly Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz Elorda.info-ǵa silteme jasap.
«18 sáýirde Ystanbuldaǵy QR Bas konsýldyǵyna bizdiń azamattan qońyraý kelip tústi, ol ózine oq tıgenin habarlady. Konsýl dereý zardap shekken azamatqa baryp, ony jergilikti aýrýhanaǵa jetkizdi. Medısınalyq tekserýden ótti, ota jasalady dep kútilýde. Qazir jerlesimizdiń jaǵdaıy turaqty», - dedi Aıbek Smadıarov.
Málimetke sáıkes, jerlesimiz jaraqat alǵan kezde qasynda áıeli bolǵan.
«Aldyn ala málimetter boıynsha, otandasymyz jergilikti azamattar arasyndaǵy atysqa kezdeısoq tap bolǵan. Ol ózdiginen ketip bara jatqanda oq tıgen. Búginde polısıa oqıǵanyń mán-jaıyn anyqtaý úshin tergeý júrgizip jatyr», - deıdi vedomstvodan.