Qalashyqta qurylys qarqyndy júredi
Memleket basshysynyń tapsyrmasy aıasynda qazaq biliminiń qarashańyraǵy Ál- Farabı atyndaǵy ulttyq ýnıversıtette qurylystyń ekinshi kezeńi bastalyp, jańadan salynatyn jataqhananyń alǵashqy qadasy qaǵyldy. Osynaý saltanatty sharaǵa Ǵylym jáne joǵary bilim mınıstri Saıasat Nurbek, Ulttyq ǵylym akademıasynyń prezıdenti Kúnsulý Zakarıa, «Atameken» Ulttyq kásipkerler palatasy basqarma tóraǵasynyń birinshi orynbasary Maqsat Qıqymov, Almaty qalasy ákiminiń orynbasary Álisher Ábdiqadyrov, Almaty qalasy kásipkerler palatasynyń tóraǵasy Áýez Taıymbetov qatysty.
Alǵashqy sóz kezegin alǵan oqý ordasynyń basshysy Janseıit Qanseıituly oqý ordasynyń ekinshi tynysy ashylyp, qarqyndy qurylys bastalatynyn jetkizdi.
– Barshamyz tarıhı sátke kýá bolyp otyrmyz. Memleket basshysynyń tikeleı qoldaýynyń arqasynda qalashyq ishinen 12 myń stýdentti qamtıtyn jańa jataqhanalar boı kóteretin boldy. Búgin eń alǵashqy jataqhananyń kirpishi qalanyp jatyr. Bas josparǵa sáıkes, jańadan boı kóteretin ǵımarattar qatarynda 12 jataqhana, 9 oqý korpýsy, 5 ákimshilik ǵımarat salynady. Alǵashqy qurylystyń irgetasy qalanyp, kapsýlaǵa mınıstrdiń qoly qoıylǵan arnaıy hatty salamyz. Taý etegine túren salyp, qalashyqta qurylys bastalady, – dedi rektor.
Osynaý alyp qurylysqa qoldaý bildirip jatqan shahar basshysyna alǵysyn bildirip, qala ákiminiń orynbasary Álisher Ábdiqadyrovqa sóz kezegin usyndy. Óz kezeginde qala basshysynyń orynbasary elimizdiń maqtanyshy bolǵan oqý ordasyna qashanda qoldaý bildirip, kómek kórsetýge daıyn ekendikterin jetkizdi.
Saltanatty sharanyń qonaǵy, Astanadan arnaıy kelgen Ǵylym jáne joǵary bilim mınıstri Saıasat Nurbek elimizde eń alǵashqy akademıalyq qalashyq bolyp ashylǵan oqý ordasyna 1974-1975 jyldan beri qomaqty qarjynyń bólinbegenin, araǵa uzaq jyldar salyp Memleket basshysy Qasym-Jomart Toqaevtyń qoldaýynyń arqasynda ýnıversıtettiń ekinshi tynysy ashylyp jatqanyna toqtaldy.
– Biz úshin óte qýanyshty kún bolyp otyr. Bul bilimge, ǵylymǵa kórsetilip jatqan qoldaý. Sondyqtan oqý ordasyn jańa ınovasıalyq deńgeıge jetkizeıik. Bilikti mamandar daıarlap, elimizdiń damýyna úles qosaıyq.
Jalpy, Almatydaǵy eń ózekti másele jataqhana tapshylyǵy ekenin bilesizder. Máselen, 180 myńnan astam stýdenttiń kem degende 30 myńy jataqhanaǵa muqtaj. Biz Memleket basshysynyń tapsyrmasyna sáıkes «Almaty qalasynyń damý baǵdarlamasy» negizinde mınıstrlikpen birlesip, jataqhana máselesin 4-5 jyldyń ishinde sheshýdi qolǵa alǵan edik. Árıne, eń aldymen qala aýmaǵyndaǵy jerdiń tapshylyǵy kedergi bolǵanymen, jataqhana qurylysyn salýǵa nıetti ınvestorlar óte kóp, – dedi mınıstr.
Sonymen qatar, Ǵylym jáne joǵary bilim mınıstri Qonaevta akademıalyq qalashyq salý jumystarynyń bastalǵany men «2023–2029 jyldarǵa arnalǵan Joǵary bilim men ǵylymdy damytý tujyrymdamasynyń» jobasy týraly keńinen baıandady. Joba barysynda stýdentter jataqhanasynyń sany artyp, 7 jylda jańadan 10 myń oryn ashýdy josparlap otyrǵanyn jetkizdi.