Kınofestıvalge bıyl 13 elden barlyǵy 42 kınotýyndy qatysty
Ystanbul qalasynda ótken Korkut Ata Turkic World Film Festival kınofestıvaliniń saltanattynda Sh.Aımanov «Qazaqfılm» kınostýdıasy «Túrki elderi kınematografıasyna qosqan úlesi úshin» arnaıy júldemen marapattaldy. Bul nagradany kınostýdıanyń prezıdenti Aqan Sataevqa tabystady, dep habarlaıdy Almaty-akshamy.kz «Qazaqfılm» kınostýdıasyna silteme jasap.
Marapattaý saltanaty ádettegideı qyzyl kilem ústinen óti rásimimen bastaldy. Bul sharaǵa Qazaqstannyń delegasıasy – Qazaqstannyń halyq artısi Asanali Áshimov, «Qazaqfılm» kınostýdıasynyń prezıdenti Aqan Sataev, kınostýdıanyń óndiris boıynsha vıse-prezıdenti Aıdar Batalov, «Ulttyq kınony qoldaý memlekettik ortalyǵy» KEQ Bas prodúseri Adaı Ábildınov, Qazaqstannyń eńbek sińirgen qaıratkeri Rýstem Ábdirashev, akter Berik Aıtjanov, akter Erkebulan Daıyrov aktrısalar Almıra Tursyn jáne Madına Esmanova, rejıser Nurǵısa Álmurat, prodúser Nurlan Qoıanbaev jáne basqalary qatysty. Festıváldiń jabylý saltanatyna QR Mádenıet jáne sport mınıstri Aqtoty Raıymqulova da qatysty.
Aıta ketsek, festıvál sheńberinde Qazaqstan, Ázirbaıjan, Túrkıa, Ózbekstan jáne Qyrǵyzstan mınıstrleri joǵaryda atalǵan memleketterde «Qoqyt ata» festıvalin ótkizý, sondaı-aq kıno óneri salasynda yntymaqtastyq jóninde memorandýmǵa qol qoıdy.
Túrkıada alǵash ret ótkizilip otyrǵan Korkut Ata Turkic World Film Festival kınofestıvalinde bıyl 13 elden barlyǵy 42 kınotýyndy qatysty.
Festıváldiń ashylý saltanatynda rejıser Aqan Sataevtyń «Tomırıs» fılmi kórsetildi.