2035 jyly mundaı kólikterdiń naryǵy 25 mlrd dollarǵa jetedi
Ushatyn kólikter bizge qazir ǵylymı fantasıka sıaqty kórinýi múmkin. Alaıda olardyń ómirge kelýine az ýaqyt qaldy, dep habarlaıdy Almaty-akshamy.kz.
Euronews.com saıtynyń málimetinshe, búgingi tańda adamdar men júkterdi tasıtyn ózdiginen ushatyn apparattardy jasaýǵa qomaqty qarjy bólinip jatyr. Bul degenińiz ushatyn kólikterdiń kóp uzamaı ómirge keletinin bildiredi.
Qazir adamdar kóp ýaqytyn kólik keptelisinde ótkizedi, tyǵyz sharýamen júrgender der kezinde dittegen jerine jete almaı qapa bolyp jatady. Sondyqtan kópshilikti avtomobılden góri áýede ushatyn kóliktiń iske qosylǵany qyzyqtyrady. Mamandardyń boljamy boıynsha, 2035 jyly mundaı kólikterdiń naryǵy 25 mlrd dollarǵa jetedi. Sol sebepti ınvestorlar ushatyn kólikterdiń jobasyna qarajat quıyp jatyr eken.
Ushatyn kólikterdiń biri - tiginen ushyp, qonatyn eV-TOL apparaty. Ol aýaǵa zıandy kómirqyshqyldy taratpas úshin elektr qozǵaltqyshymen jabdyqtalǵan.
Qazir 20 jolaýshyǵa deıin tasymaldaı alatyn apparatty shyǵarýmen álem boıynsha 50-den astam kásiporyn aınalysyp jatyr. Sonyń biri túrkıalyq AirCar startapy. Ystambuldyq joba 2017 jyldan beri qaladaǵy kólik keptelisi men aýany lastaý máselesin sheshýge tyrysyp jatyr. AirCar basty maqsaty – elektr qozǵaltqyshymen jabdyqtalǵan ushqyshsyz áýe taksıi parkin qurý.
Shaǵyn kólikterdi myńdaǵan synaqtan ótkizgennen keıin bıyldan basap tolyq kólemdi apparatty synaqtan ótkizýdi bastalǵan. Kompanıanyń negizin qalaýshy Eraıa Altynbozardyń aıtýynsha, áýe taksıi arqyly jolaýshylardy tasymaldaý 2025 jyly iske qosylady. Alaıda, ol úshin birneshe kedergini eńserý qajet.
Mundaı kederginiń biri – tabys tabý. Berlın tehnıkalyq ýnıversıtetiniń profesory Andreas Bardenhagennyń paıymdaýynsha, ushatyn kólikke qaraǵanda ádettegi poıyz Berlın ortalyǵynan áýejaıǵa deıin adamdardy anaǵurlym kóp jetkizedi. Eger ushatyn kólik arqyly júzdegen adamdy tasymaldaý bastalsa áýe keńistigindegi júkteme shamandan tys artady. Bul qala turǵyndaryna unaı qoımaýy múmkin. Sondyqtan ushatyn taksı qyzmetine qaltaly adamdardyń bir bóligi ǵana júginýi múmkin.