Dollar men munaıdyń qubylýy saldarynan janarmaıdyń lıtri bizdiń aqshaǵa shaqqanda 680 teńgeden saýdalanyp jatyr.
Inflıasıanyń ósýi turǵyndardyń qaltasyn qaqty. Úkimet, shuǵyl is-qımyl josparyn daıyndaımyz - dep otyr, dep habarlaıdy Almaty-akshamy.kz 24.kz-ke silteme jasap.
Úsh aı burynǵy saıası doda aldyndaǵy benzın 19,81, dızel baǵasy 18,59 lıra bolatyn. Al qazir benzın 38,23 dızel 38,87 lıra. Elde janarmaı baǵasynyń sońǵy aılarda qymbattaýy tasymalǵa, al tasymaldyń qymbattaýy barlyq salaǵa áser etti.
Hakan Emar, turǵyn: - Ókinishke oraı, bul jaǵdaı qaltamyzdy qaqty. Tasymaldyń ózine tabysymyzdyń bir bóligin jumsaımyz. Dollardyń da qymbattaýy, barlyq taýarlardyń baǵasynyń ósýine alyp keldi. Sonyń ishinde, mashına bólshekteri birneshe kúnde 30-40% artqanyn kórip kóńilimiz tústi. Qazir aınaladaǵy tanystarymyzdyń bárimizdiń áńgimemiz osy benzın baǵasy. Turmysymyzǵa tikeleı áser etip otyr.
Elde shilde aıynda kóp salada eńbekaqy kóbeıgenimen aqshanyń quny kún saıyn tómendep jatyr, deıdi turǵyndar.
Jafer Er, turǵyn: - Benzınniń qymbattaýy adamdardyń 60-70% tikeleı áser etedi. Meniń ekinshi jumysym lıftilerdi jóndeý. Qala ishinde kólikpen júrgendikten bizdiń qyzmet aqymyz da avtomatty túrde qymbattady.
Túrik bıligi, ınflásıamen kúresti kúsheıtti. Qyrkúıek aıynda úkimet orta jáne qysqa merzimdi is- qımyl josparyn usynbaq.
Jevdet Iylmaz, Túrkıa vıse-prezıdenti: - Inflásıaǵa qarsy kúresti tabandy túrde jalǵastyramyz.Ekinshiden resessıaǵa ushyramaı, elimizdiń turaqty damýyn kózdeımiz.
Benzınniń qymbattaýy qoǵamdyq kólik pen taksı qyzmetiniń tarıfine de áser etti. Ystambul men Ankarada avtobýsta júrý quny bizdiń aqshamen eseptegende 255 teńgeden bastalady.