Kók týdy Shymbergenov pen Dýbovıskaıa ustap shyǵady.
Týra bir aıdan keıin Qytaıdyń Hanchjoý qalasynda jyldyń basty básekesi Azıa oıyndary bastalady. 4 jylda bir ótetin baıraqty básekege ulttyq qurama qyzý daıyndalyp jatyr, dep habarlaıdy Almaty-akshamy.kz 24.kz-ke silteme jasap.
Kúni keshe ashylý saltanatynda kók baıraǵymyzdy ustap shyǵatyn sportshylardyń esimi belgili boldy. Bul qurmetke bokstan Ulttyq qurama kapıtany ári Álem chempıony Aslanbek Shymbergenov pen bıiktikke sekirýden ulttyq qurama úzdigi ári Azıa chempıony Nadejda Dýbovıskaıa ıe boldy. Baıraqty básekeni qabyldaıtyn Hanchjoý qalasynda da qazir qarbalas.
12 mıllıon turǵyny bar qalada sporttyq ınfraqurylymdar tolyqtaı qoldanysqa berilip, testtik jarystar ótkizilip jatyr. Azıa oıyndarynda 474 medal jıyntyǵy sarapqa salynady. Onyń 381-i olımpıadalyq, 93-i olımpıadalyq emes sporttar boıynsha. Birer kún buryn qurlyqtyq dodanyń bıletteri resmı satylymǵa shyqty.