Ankarada «Til týynyń tuǵyry - Ahmet Baıtursynov» atty ult ustazynyń týǵan kúni men Qazaqstan halqy tilderi kúnine arnalǵan konferensıa ótti.
Atalǵan is-sharaǵa Qazaqstan Elshisi Erkebulan Sápıev, Pamýkkale ýnıversıtetiniń oqytýshysy profesor, ǵylym doktory Nergıs Bıraı, Eýrazıa jazýshylar odaǵynyń tóraǵasy, ǵylym doktory Iakýp Ómeroǵlý, Ankara Hajy Baıram Velı ýnıversıtetiniń oqytýshysy profesor, ǵylym doktory Gúljanat Qurmanǵalıeva-Erjılasýn, Hadjettepe ýnıversıtetiniń oqytýshysy, profesor, ǵylym doktory Ózkúl Chobanoǵlý, zıaly qaýym, BAQ ókilderi jáne qazaq-túrik stýdentteri qatysty, dep habarlaıdy Almaty-akshamy.kz.
Elshi óz sózinde A.Baıtursynuly XX ǵasyr basyndaǵy qazaq zıalylarynyń kórnekti ókili, qazaqtyń álipbıin qoldanysqa engizip qazaq tiliniń aıasyn keńeıtkenin jáne qazaq halqynyń táýelsizdikke qol jetkizip, sol kezdegi damyǵan eldermen terezesi teń bolýy úshin júrgizgen kúresi men eńbekterine toqtalyp ótti.
G. Qurmanǵalıeva-Erjılasýn óziniń baıandamasynda Ahmet Baıtursynulynyń ómiri, ǵylymı eńbekteri, qazaq ǵylymyna qosqan orasan zor úlesi jaıynda baıandama jasady.
N. Bıraı Ahmet Baıtursynulynyń qazaq tiliniń álipbıi, onyń oqytylýy, til jónindegi pikirleri, qazaq termınologıasy jáne qazaq ádebıetiniń oqytý máseleleri týraly zerttegen ǵylymı jumystaryna keńinen toqtalyp ótti.
Óz sózinde Ia.Ómeroǵlý bıylǵy «Kardesh kalemler» jýrnalynyń qyrkúıektegi arnaıy sany Ahmet Baıtursynulyna arnalyp otyrǵanyn habarlady. Jýrnalda ult ustazynyń ǵylymı muralary men maqalalary, sondaı-aq ár jyldary tabylǵan qoljazbalary men tutynǵan jádigerleriniń sýretter jarıalanǵan.
Ǵylym doktory Ó. Chobanoǵlý Ahmet Baıtursynuly arab álipbıin qazaq tiline beıimdep shyǵarǵanyn jáne bul kitap sol kezdegi qazaq halqynyń aǵartý isine qosqan erekshe úlesi ekenin baıandady.
Konferensıanyń aıaǵynda Túrkıa ýnıversıtetterinde bilim alyp júrgen stýdentter men doktoranttar A. Baıtursynulynyń óleńderi men shyǵarmalaryn oqyp, kórermenderdiń ystyq yqylasyna bólendi.