89-shy halyqaralyq kitaphanalyq jáne aqparattyq kongresi (IFLA) aıasynda 2025 jylǵy 19 tamyz kúni Astana qalasynda ótken Qazaqstan Respýblıkasy Oqý-aǵartý mınıstrliginiń Respýblıkalyq ǵylymı-pedagogıkalyq kitaphanasynyń «BALALAR KİTAPHANASY: OQÝSHY – OQYRMAN. OZYQ OI. ADAL AZAMAT» taqyrybyndaǵy bilim berý uıymdarynyń kitaphanashylaryna arnalǵan respýblıkalyq seksıasyna Túrkıa Respýblıksy mádenıet jáne týrızm mınıstrligi kitaphanalar men basylymdar ıý basqarmasynyń dırektory Taner Beıoǵly qatysty.
«Atajurtqa anajurttan ystyq yqylasymyzdy, sálemimizdi ala keldik. Qazaqstanda alǵash ret 89-shy halyqaralyq kitaphanalyq jáne aqparattyq kongresi (IFLA) ótip jatyr. Qazaqstan osy tarıhı oqıǵany kóregendikpen ári bıik deńgeıde qabyldap otyr. Túrkıa bul kongresti 1995 jyly qabyldaǵan bolatyn. Ankaradan Astanaǵa deıingi jol – bizdiń óńirdiń kitaphana isi men mádenı yntymaqtastyqtyń jahandyq kún tártibin qalyptastyrýdaǵy ósip kele jatqan rólin kórsetedi.
Kitaphanalar tek jeke tulǵanyń damýyna ǵana emes, qoǵamnyń zıatkerlik jáne mádenı bolmysynyń qalyptasýyna da sheshýshi yqpal etedi.
Túrkıanyń túkpir-túkpirinde biz ártúrli damý kezeńderine beıimdelgen bóbek jáne balalar kitaphanalaryn quryp jatyrmyz. 0–3 jasqa arnalǵan kitap buryshtarynan bastap, 4–6 jasqa arnalǵan shyǵarmashylyq aımaqtarǵa jáne 7–14 jas aralyǵyndaǵy balalarǵa arnalǵan oqý men bilim keńistikterine deıin bul kitaphanalar balalardyń kitappen tereń, qýanyshty ári berik baılanys ornatýyna jaǵdaı jasaıdy.
Ertegi saǵattary, shyǵarmashylyq drama, ǵylymı sheberhanalar, logıkalyq oıyndar jáne ınteraktıvti sıfrlyq kontent arqyly biz oqý tájirıbesin baıytamyz. Tehnologıany kiriktirý qıaldy, synı oılaýdy jáne ózindik senimdilikti qoldaıdy – bular bilim qoǵamyna belsendi qatysý úshin qajetti daǵdylar.
Balanyń kitappen erte baılanysy tek saýattylyqty qalyptastyrmaıdy; ol etıkalyq jaýapkershiliktiń, táýelsiz oılaýdyń jáne azamattyq sananyń negizin qalaıdy. Osy turǵydan alǵanda, kitaphanalar tek bilim berýde ǵana emes, sondaı-aq tulǵa tárbıesinde de ortalyq ról atqarady.
Baýyrlas el Qazaqstanmen tájirıbe almasýǵa, birlesken jobalardy júzege asyrýǵa jáne balalarǵa shyǵarmashylyq jáne shabyttandyratyn oqý ortasyn qamtamasyz etý úshin birge eńbek etýge daıynbyz»,-dedi óz sózinde Beıoǵly.
Seksıa jumysyna Qazaqstan Respýblıkasy Oqý-aǵartý mınıstrliginiń ókilderi, bilim basqarmalarynyń kitaphana isi jónindegi mamandary, ádistemelik kabınetterdiń ádiskerleri, aýdandyq jáne qalalyq bilim bólimderiniń qyzmetkerleri, avtomattandyrylǵan aqparattyq kitaphana júıeleriniń avtorlary, baspa qyzmetkerleri jáne respýblıka mektep kitaphanashylary qatysty.