Shyǵystyń uly aqyny ári oıshyly Nızamı Gánjáýıdiń shyǵarmashylyǵy sondaı baı da san qyrly, oǵan qansha ret úńilseń de, qaı qyrynan qarasań da, tolyq meńgerý, túbegeıli uǵyný múmkin emes.
Bul kezdeısoq emes: Nızamı Gánjáýı búkil álemde, sonyń ishinde túrki dúnıesinde – Túrkıada, Qazaqstanda, Ózbekstanda jáne basqa elderde súıispenshilikpen qabyldanyp, keńinen nasıhattalyp, qaıta-qaıta basylyp shyǵyp keledi.
Keshe Bakýdegi Túrki mádenıeti men murasy qorynyń ortalyq shtab-páterinde uıym qyzmetkeri, aqyn, Ázerbaıjan Jazýshylar odaǵy Jastar keńesiniń tóraǵasy Fárıd Húseınniń uly aqyn Nızamı Gánjáýıdiń «Hamsasyndaǵy» ólim sátterine arnalǵan «Aqıbetnama» atty kitabynyń tusaýkeser rásimi ótti, - dep habarlaıdy Aqshamnews.kz.
«Aqıbetnama» – Nızamı Gánjáýıdiń «Hamsasyndaǵy» ólim taqyryptaryna qatysty ádebı túsindirmelerden quralǵan esseler jınaǵy.
İs-sharaǵa TÜRKPA-nyń bas hatshysy Mehmet Súreııa Er, Ázerbaıjanda akkredıttelgen túrki elderiniń dıplomatıalyq korpýs ókilderi, sondaı-aq memleket qaıratkerleri, ǵalymdar men ádebıet áleminiń ókilderi, BAQ qyzmetkerleri qatysty.
Sharada sóz sóılegen Túrki mádenıeti men murasy qorynyń prezıdenti Aqtoty Raıymqulova qor túrki halyqtarynyń baı mádenı murasyn saqtaý men nasıhattaý baǵytynda mańyzdy jobalardy júzege asyryp jatqanyn atap ótti.
«Qordyń bastamasymen daıyndalǵan basylymdar men túrli halyqaralyq is-sharalar túrki halyqtarynyń baı ádebı jáne mádenı dástúrlerin keń aýdıtorıaǵa jetkizýge qyzmet etedi. Bul baǵytta Fárıd Húseınniń eńbegi zor. Ol qordyń kóptegen sharalaryna qatysyp, Ázerbaıjan, Qazaqstan, Qyrǵyzstan, Túrkıa jáne basqa elderde qordy tabysty tanystyrdy. Onyń redaktorlyǵymen jaryq kórgen basylymdar túrli kitap kórmelerinde qoıyldy», – dedi A. Raıymqulova.
Sharanyń moderatory, Ázerbaıjan Jazýshylar odaǵynyń Halyqaralyq baılanystar jónindegi hatshysy, aqyn ári aýdarmashy Sálim Babýllaoǵly qordyń basylymdary men sharanyń mańyzy jóninde aqparat berdi. Ol qordyń bastamasymen jaryq kórgen basylymdar tek qana klasıkalyq jáne zamanaýı ádebıettiń tanystyrylymy emes, sonymen birge túrkitildes elder arasyndaǵy mádenı baılanystardyń nyǵaıýyna da qyzmet etetinin aıtty.
Sálim Babýllaoǵly Nızamı murasyn oqytý men nasıhattaýda bul basylymnyń qundy derekkóz retinde únemi paıdalanylatynyna senim bildirdi.
Ázerbaıjan Atatúrik ortalyǵynyń dırektory, akademık Nızamı Jáfarov Fárıd Húseınniń shyǵarmashylyǵy týraly aıta otyryp, aqynnyń eńbekterinde ulttyq qundylyqtardyń saqtalýy men túrki dúnıesiniń ortaq mádenı murasynyń nasıhattalýy aıqyn kórinetinin atap ótti.
“Aqıbetnama” oqyrmandarǵa adam taǵdyry, rýhanıat pen mádenıet taqyryptaryn tereńinen tanystyrady. Shyǵarmadaǵy áńgimeler men taldaýlar ulttyq qundylyqtardyń saqtalýyn, adam bolmysynyń qyr-syryn jáne qoǵam men jeke tulǵa arasyndaǵy qarym-qatynastardy keńinen beıneleıdi», – dedi akademık.
Kitaptyń redaktory, fılologıa ǵylymdarynyń fılosofıa doktory, dosent, nızamıtanýshy Záhra Allahverdıeva men fılologıa ǵylymdarynyń doktory, profesor Rústem Kamal qordyń bastamasymen jaryq kórgen basylymdardyń oqyrmandar arasynda úlken qyzyǵýshylyq týdyryp, túrkitildes halyqtar arasyndaǵy mádenı yntymaqtastyqty nyǵaıtýǵa qyzmet etetinin atap ótti. Olar Fárıd Húseınniń eńbekterinde ulttyq qundylyqtardy saqtaý men adam taǵdyryn sheberlikpen beıneleýimen qatar, túrki dúnıesiniń ortaq mádenı murasyn nasıhattaýyn joǵary baǵalady.
Nızamı Gánjáýı atyndaǵy Ázerbaıjan Ádebıeti ınstıtýtynyń dırektory, fılologıa ǵylymdarynyń fılosofıa doktory Mehman Hásenov pen aqyn Qısmet basylymnyń ádebı-fılosofıalyq artyqshylyqtaryn atap ótip, jas avtordyń shyǵarmashylyǵyn joǵary baǵalady.
İs-shara barysynda Fárıd Húseınniń óleńderi belgili kórkemsóz sheberleri Týral Ahmed, Gúnel Hamıdova, Sabıra Abdýllaevanyń oryndaýynda oqyldy, jas aqynnyń óleńderine jazylǵan ánder Elgız Alıev, Aıshen Mehdıeva, Iaǵýt Halılzadeniń oryndaýynda tyńdaldy. Ánshilerge tarda Sáhavát Mámmádov, qylqobyzda Toǵrýl Qasymov, pıanınoda Agaráhım Salah súıemeldedi.
Shara sońynda F. Húseın oqyrmandarǵa kitaptaryna qoltańba berip, estelik sýretke tústi.
Iá, uly Nızamı Gánjáýı júzdegen, myńdaǵan kitapqa arqaý boldy, ári bola beredi. Aqynnyń «Hamsasyn» bir ret paraqtasań jetkilikti.