Túrksib aýdanynyń ákimi Baqytjan Aqjarov «Nurshashqan», «Maık», «Áýejaı» shaǵynaýdandarynyń turǵyndaryna esep berip, ákimdiktiń atqarǵan jumystaryn baıandady. Turǵyndar kópten beri tolǵandyrǵan, sheshimi tabylmaǵan suraqtaryn qoıdy.
Shara barysynda qalalyq basqarmalar ókilderi, quqyq qorǵaý organdary men komýnaldyq qyzmet basshylary birlesip, azamattardy jeke máseleleri boıynsha qabyldady.
Aýdan ákimi 2020–2024 jyldarǵa arnalǵan «Jańa Almaty» shet aımaqtardy damytý keshendi josparynyń qalaı júzege asyrylyp jatqanyn aıtyp berdi. Baqytjan Aqjarov «Jas qanat» shaǵynaýdanyn sýmen jabdyqtaý boıynsha JSQ ázirlenip, merdiger anyqtalǵanyn habarlady. «Tómengi pátıletka» aýmaǵyn sýmen jabdyqtaý boıynsha jobalyq-smetalyq qujattama ázirlendi, merdiger anyqtaldy, jobany iske asyrý merzimi – 2022-2023 jyldar. Jobamen 4000-nan astam úı qamtylady, 13,3 myń turǵyn, jelilerdiń uzyndyǵy 92,4 shaqyrymdy quraıdy. Ústimizdegi jyly aýdanymyzda josparlanyp otyrǵan jumystar jeterlik. Jol ınfraqurylymyn jaqsartý, jastar men balalarǵa arnalǵan sportyq alańdardy salý. Qalamyzdyń tabıǵaty men kórkin jaqsartý maqsatynda aǵashtar men gúlder otyrǵyzý. Kúndelikti turmysta qajettilik týdyratyn sý, ja- ryq, jol syndy máselerdi sheshetin bolamyz», – dep tolyqtyrdy Túrksib aýdanynyń ákimi.
Sondaı-aq, aýdanda ınjenerlik jelilerdi aǵymdaǵy jóndeý jumystary júrgizilýde. Ótken jyly 4,4 shaqyrym sýmen jabdyqtaý jelisi, 2021 jyly 700-den astam úıdi (2800 turǵyn) qamtı otyryp, 6,5 shaqyrymy rekonstrýksıalandy.
«Ákimdiktiń atqaryp jatqan jumystaryna kóńilimiz tolady. Halyqtyń pikirine qulaq asyp, ózekti máselelerdi kóppen birge sheshedi. Qarap otyrsaq, «Nurshashqan» shaǵynaýdany jyl saıyn kórkeıip kele jatyr. Jolymyz jóndeldi, jaryq qoıyldy, jańa mektep qoldanysqa berildi. Qıraǵaly turǵan kóp qabatty úılerimiz jóndelip, jańa turǵyn úıler salyndy. Shaǵynaýdanda túrli ult ókilderi beıbit ómir súrip jatqan jaıy bar», – deıdi aýdan turǵyny Tursyn Akımjan. İs-shara barysynda abattandyrý, qoǵamdyq kólik, halyqty eńbekpen qamtý, jaýapsyz merdigerler jáne basqa da máseleler kóterildi. Aıtylǵan barlyq máseleler aýdan basshylyǵynyń jeke baqylaýyna alyndy.