AES qurylysy boıynsha saraptamalyq talqylaý Qazaq onkologıa jáne radıologıa ǵylymı-zertteý ınstıtýtynda ótti, dep habarlaıdy aqshamnews.kz
Kezdesýge Almaty qalasynyń AMANAT partıasynyń ortalyq aýdandyq fılıalynyń tóraǵasy Naılá Ordabaeva, qalalyq máslıhat depýtaty Asıe Aqanova, Iadrolyq fızıka ınstıtýtynyń radıasıalyq qaýipsizdik bóliminiń basshysy Mıhaıl Mýhortov jáne qalalyq qoǵamdyq keńestiń ókili Nurjan Jaqypov qatysty.
Mundaı saraptamalyq kezdesýler ashyq dıalog formatynda ótip, AES qurylysyna qatysty referendýmǵa daıyndyq aıasynda halyqtyń barlyq suraqtaryna jaýap berýdi maqsat etedi.
Qatysýshylardyń pikiri boıynsha, Qazaqstandy damyǵan elder qataryna engizýdiń bir joly – atom elektr stansıasyn (AES) salý bolyp tabylady.
– Qazirgi zamanǵy AES-terdi eldiń negizgi energıa óndirýshi kózi retinde «jasyl energetıka» dep ataýǵa bolady. Elektr energıasyn óndiretin basqa kózdermen, mysaly, kómir nemese gaz qoldanatyn JEO-larmen salystyrǵanda, AES energıa tıimdiligi boıynsha absolútti kóshbasshy bolyp tabylady. Sondaı-aq atom elektr stansıasy – joǵary tehnologıalyq jáne senimdi keshen, ol zamanaýı jabdyqtardan, bilikti kadrlardan jáne eń bastysy, qaýipsizdik boıynsha zamanaýı ádisterden turady. AES elimizdiń ekonomıkasy úshin aýyr jáne orta ónerkásipti damytýǵa, ǵylymdy jáne energetıkalyq táýelsizdikti nyǵaıtýǵa jańa serpin berýi múmkin, – dedi Mıhaıl Mýhortov.
Asıe Aqanovanyń aıtýynsha, AES qurylysy elektr energıasy tarıfteriniń turaqtanýyna oń áserin tıgizýi múmkin.
– Energetıka mınıstrliginiń málimeti boıynsha, biz jyl saıyn 152 mıllıard vatt energıa tutynamyz, onyń ishinde 20 mıllıard vatt tapshylyqty Reseıden satyp alý arqyly óteımiz. Sondyqtan energetıkalyq qaýipsizdik týraly aıta otyryp, bizge ózimizdiń turaqty energıa kóziniń qajettigin atap ótýimiz kerek, – dedi spıker.
Suraqtarǵa jaýap bere otyryp, sarapshylar jańartylatyn energıa kózderine tolyq sený múmkin emestigin, sebebi olardyń turaqty emes ekenin atap ótti.
– JEK (jańartylatyn energıa kózderi) bazalyq energıa kózi bola almaıdy, óıtkeni olar tabıǵı jaǵdaılarǵa tolyǵymen táýeldi. Al AES kerisinshe, árdaıym jumys istep turady jáne mundaı faktorlarǵa táýelsiz, – dep qosty Naılá Ordabaeva.