Búgin Astanada qazaq-nemis mektebi qurylysynyń bastalýyn bildiretin kapsýla salý rásimi ótti.
İs-shara GFR kansleri Olaf Sholstiń Qazaqstanǵa resmı saparyna oraılastyrylyp otyr, dep habarlaıdy aqshamnews.kz.
Astanada qazaq-nemis mektebin salý jobasy Qazaqstan Prezıdentiniń 2023 jyly GFR-na sapary aıasynda qolǵa alynǵan bolatyn. Memleket basshysy Qasym-Jomart Toqaev eki el arasyndaǵy yntymaqtastyqtyń sımvolyna aınalatyn mektep qurý múmkindigin zertteýdi tapsyrdy.
Jobany Qazaqstan halqy Assamblásynyń qoldaýymen «Vozrojdenıe» qazaqstandyq nemister birlestigi, QR Oqý-aǵartý mınıstrligi, Astana qalasy ákimdigi, «Samuryq-Qazyna» Ulttyq ál-aýqat qory men Germanıa standarttary boıynsha bilim berý baǵdarlamalaryn ázirleýge jáne engizýge kómektesetin Germanıa Federaldy syrtqy ister mınıstrligi iske asyrýda.
Mektep 600 qazaqstandyq oqýshyǵa nemis tilinde halyqaralyq bilim beretin sheteldegi nemis mektepteriniń jahandyq jelisiniń bir bóligine aınalady.
Astanadaǵy qazaq-nemis mektebi eldegi jáne Orta Azıadaǵy nemis bilim berý standarttary boıynsha oqytý júrgiziletin alǵashqy mektep bolady. Oqý baǵdarlamasy boıynsha mektepti bitirgen túlekter Qazaqstanda da, Germanıada da moıyndalǵan atestat ala alady. Bul olarǵa qosymsha daıyndyq jáne qabyldaý emtıhansyz nemis joǵary oqý oryndarynda oqýyn jalǵastyrýǵa múmkindik beredi.
Joba bastamashylarynyń aıtýynsha, mektep qurylysy 2025 jyldyń sońyna deıin aıaqtalyp, al 2026 jyly mektep alǵashqy oqýshylaryna esigin aıqara ashady. Joba Qazaqstanda bilim sapasyn arttyrýǵa ǵana emes, eki el arasyndaǵy mádenıet jáne bilim salasyndaǵy baılanysty nyǵaıtýǵa da yqpal etedi dep kútilýde.