TURAN etno-folklorlyq ansambli óziniń 15 jyldyq mereıtoıyna oraı álemdik týrne ótkizedi.
Bul gastrólge Mádenıet jáne sport mınıstrligi qoldaý kórsetip otyr. Gastrólder AQSH astanasy – Vashıngtonda bastaldy, dep habarlaıdy Almaty-akshamy.kz Elorda.info-ǵa silteme jasap.
1-17 sáýir aralyǵynda Turan Eýropada birneshe konsert ótkizedi. Atap aıtqanda, ansámbl Fransıa astanasy Parıjge, Lıon jáne Belforǵa, Shveısarıa astanasy Jenevaǵa, Belgıa astanasy Brússelge, Horvatıa astanasy Zagrebke, Slovenıa astanasy Lúblánaǵa, Býdapesht pen Venaǵa barady.
Aıta keteıik, gastrólder AQSH astanasy – Vashıngtonda bastaldy. Naýryz meıramy aıasynda 21-23 naýryz aralyǵynda ujym Kolýmbıa okrýgi ýnıversıtetinde jáne Djordj Vashıngton ýnıversıtetiniń sahnasynda óner kórsetti.
Týrne aıasynda sahnaǵa Roza Baǵlanova atyndaǵy «Qazaqkonserttiń» basqa da solıseri shyǵady: kompozıtor, Qazaqstannyń eńbek sińirgen qaıratkeri, «Qazaqkonserttiń» dırektory Aqtoty Raıymqulova, ataqty tenor jáne Qazaqstannyń eńbek sińirgen qaıratkeri Medet Shotabaev pen vıolonchelıs, Shanhaı konservatorıasynyń magıstranty Talǵar Shalqaruly. Ári qaraı ansámbl Qyrǵyzstan men Ózbekstanǵa barady.
«Osy 15 jyl ishinde Turan AQSH-ta jáne basqa elderde birneshe ret óner kórsetti. Ansámbl buǵan deıin Nú-Iork, Los-Andjeles, San-Fransısko jáne Vashıngtondaǵy Karnegı hol jáne Kennedı ortalyǵy sıaqty oryndarda konsert bergen. Ansámbl elimizdiń ejelgi mýzykalyq ónerin, kómeımen án oryndaý ónerin, kóne aspaptardyń dybysyn qaıta jańǵyrtty. Bul rette, ol búkil álemdegi san myńdaǵan tyńdaýshylardyń qurmetine ıe boldy, bul sheteldikterdiń ujymǵa degen qyzyǵýshylyǵynyń dáleli», - dep atap ótti QR MSM Mádenıet komıteti tóraǵasynyń orynbasary Danıar Álıev.