QR Eńbek jáne halyqty áleýmettik qorǵaý mınıstrligi «Altyn alqa» nemese «Kúmis alqa» alǵan analarǵa járdemaqy taǵaıyndaý boıynsha proaktıvti qyzmet kórsetý kezindegi adamı faktordy tolyǵymen alyp tastady.
Budan buryn osy járdemaqyny proaktıvti formatta taǵaıyndaý kezinde Azamattarǵa arnalǵan úkimet» memlekettik korporasıasy jáne Eńbekmıniniń aýmaqtyq departament qyzmetkerleriniń qatysýy qajet bolyp, nátıjesi 7 jumys kúnine deıin sozylatyn edi, dep habarlaıdy Almaty-akshamy.kz QazAqparatqa silteme jasap.
Endigi jerde atalǵan qyzmetti proaktıvti formatta alǵan kezde járdemaqy taǵaıyndaý aqparattyq júıe arqyly júrgiziledi, sonyń arqasynda qyzmet kórsetý merzimi 1 jumys kúnine deıin qysqardy.
Eger de kóp balaly ana «Altyn alqa» nemese «Kúmis alqa» alqalarymen marapattalsa, tıisti málimetter Eńbekmıniniń aqparattyq júıesine avtomatty túrde túsedi.
Ári qaraı júıe proaktıvti formatta járdemaqy taǵaıyndaýǵa kelisim alý úshin 1414 nómirinen SMS habarlama jiberedi.
SMS habarlamaǵa oń jaýap alynǵan jaǵdaıda júıe járdemaqy taǵaıyndaý týraly sheshimdi múldem adamnyń qatysýynsyz avtomatty túrde qabyldaıdy.
Eńbekmıni osyndaı tásildi basqa da memlekettik qyzmetterdi kórsetý kezinde de engizýdi kózdep otyr.