Saýd Arabıasynyń soltústik-batysynda túıe jarys ótip jatyr.
Júlde qory 21 mıllıon AQSH dollarynan asady, dep habarlaıdy Almaty-akshamy.kz 24.kz-ke silteme jasap.
Sarapshylar bul saıys tarıhyndaǵy eń úlken soma deıdi. Dodaǵa álemniń túkpir-túkpirinen úmitkerler jınalǵan. Jarystan basqa, túrli mádenı is-sharalar men kórmeler de uıymdastyrylǵan. Keıingi jyldary Saýd Arabıasynyń bıligi ekonomıkany ártaraptandyryp, san alýan týrısik is-sharalar ótkizýdi ádetke aınaldyrǵan.
«Bizdiń aımaqta mundaı iri jarys buryn-sońdy ótip kórmegen. Óte qomaqty júldeler tigilip otyr. Bul bizge, bir jaǵynan, qyzyq, ekinshi jaǵynan, zor maqtanysh», - deıdi kórermen Ennad Ál-Balaýı.
«Biz de osy jarysqa óz túıemizdi ákeldik. Ázirge besinshi orynda kele jatyr. Birinshi oryn alamyz degen úmitimiz de joq emes. Júlde qorynyń joǵary bolǵany óte zańdy. Óıtkeni bul elde túıe - eń mańyzdy janýar», - deıdi AQSH azamaty Sýız Bıts.