Osydan 10 kún buryn «Týǵan elge saıahat» balalar poıyzy alǵashqy saparyn bastaǵan bolatyn.
Osy ýaqyt aralyǵynda balalar Qazaqstannyń eń kórikti jáne tarıhı ólkelerine baryp, tabıǵı jaýharlarymen tanysty. Birinshi poıyz Astana – Baıqońyr – Túrkistan – Almaty – Býrabaı – Astana baǵytynda saıahat uıymdastyrdy, dep habarlaıdy Almaty-akshamy.kz.
Egemen.kz-tiń habarlaýynsha, «Týǵan elge saıahat» jobasyna 200 bala qatysty. Birinshi kezeń qatysýshylary saıahattan erekshe áser alǵan.
«Balalardyń sapardan kózderi janyp, zor shabytpen, ynta-jigermen kelgeni baıqalyp tur jáne bul jobaǵa berilgen eń jaqsy baǵa desek, artyq aıtqandyq bolmas. Eń qyzyqty jerlerdi tańdap, óskeleń urpaqqa ulan-baıtaq elimizdiń kórikti jerlerin kórsetýge tyrystyq. Jobaǵa qyzyǵýshylyq jyl saıyn artyp, balalar ony typyrshı, asyǵa kútetini seziledi», dep atap ótti «Samruk-Kazyna Trust» áleýmettik jobalardy damytý qorynyń bas dırektory Alfıa Adıeva.
Saıahat kerýeninde elordaǵa birinshi ret kelgender de bar. Máselen, «Qazposhta» kompanıasynyń Shortandy qalasyndaǵy bólimshesinde bes jyl jumys istep kele jatqan Gúlnar Qurmettiń 11 jasar qyzy alǵash ret týǵan aýylynan tysqary shyqqan.
«Meniń qyzym kóńildi saparǵa attanatyna qatty qýanyp, kún saıyn qońyraý shalyp otyrdyq. Sóıtip kúnde kórgenderiniń bárin sıpattap, saıahattyń, jańa qalalar men dostardyń, jalpy barlyǵynyń unaıtynyn áńgimeledi. Ómirindegi eń kúshti kanıkýl ekenin jetkizdi. «Samuryq Qazyna» qory balalar úshin osyndaı keremet múmkindik syılap, armandaryn oryndaǵanyna óte rızamyn», deıdi Gúlnar Qurmet.
Joba aıasyndaǵy kelesi eki sapar taǵy 400 oqýshyny qamtıdy. Igi bastama «Samuryq-Qazyna» AQ kompanıalar tobynyń atynan «Samruk-Kazyna Trust» áleýmettik jobalardy damytý qorynyń qarjylyq qoldaýymen jáne QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń qatysýymen, «Áleýmettik jobalar qorymen» yntymaqtastyqta júzege asyrylyp jatyr.