Memleket basshysy Q.Toqaevtyń Qazaqstan halqyna Joldaýynyń negizgi ıdeıasy – elimizdiń qazirgi syn-qaterlerge toly kezeńdegi qıyndyqtaryn eńserip, qoǵamymyzdaǵy ózekti máselelerge qatysty túbegeıli, keshendi jańǵyrýdyń joldaryn anyqtaý.
Qańtar oqıǵasynyń sabaǵy halqymyzdyń jadynda esten ketpeıtin iz qaldyrǵany belgili, endi onyń saldarlarymen ǵana emes, sonymen qatar tarıhı derektiń tereńde jatqan sebepterin aıqyndaýymyz qajet ekeni aıtyldy.
«Halyq únin estıtin memleket» tujyrymdamasy ári qaraı qoǵamdy pármendi demokratıalandyrý úderisteri arqyly aıshyqtala, damı túsetini baıyptaldy. Elimizde turaqty túrde jumys atqaratyn Ulttyq Quryltaıdy qurý ıdeıasy da Joldaýdyń jańashyldyq qyry bolyp keledi. Azamattardyń saıası mádenıetin qalyptastyrýǵa jáne ony órkenıetti sıpatta órbitýge saılaýdy ádil jolmen ótkizý úlken yqpalyn tıgizedi.
Jalpy, saılaý máselesindegi kemshilikter Prezıdent tarapynan ashyq aıtylyp, birshama synı tujyrymdar keltirildi. Endi saılaýǵa qatysýdy belsendendirý, jalpy, osy saladaǵy demokratıalyq kelbetti ornyqtyrý úshin majorıtarlyq sıpattaǵy saılaýdyń úles salmaǵyn 30 paıyzǵa jetkizý kózdeledi. Demek, depýtattar korpýsy birte-birte óziniń maǵynalyq sıpaty boıynsha bıliktiń naǵyz demokratıalyq kúshine aınalýyna tıis.
Jańadan ashylatyn Abaı, Ulytaý, Jetisý oblystarynyń ózi ákimshilik-aımaqtyq deńgeıdegi úlken jumystardyń tıimdiligin arttyryp, óńirlik deńgeıdegi áleýmettik máselelerdi ýaqytyly sheship otyrýǵa ońdy yqpalyn tıgizedi degen oımen astasyp jatyr.
Syrtqy jáne ishki saıası-áleýmettik úderister ázirge elimizde úılesimdi ahýaldy qalyptastyrýǵa keıbir ózindik kedergilerin tıgizip otyr, sondyqtan reformalardy tolyqtaı júzege asyrý úshin árbir Qazaqstan azamatynyń úlken jaýapkershiligin arttyrý qajet. Otandastarymyzdyń eńbekqorlyǵy pen áleýmettik ádilettilikke beıimdiligi qoǵamdaǵy túbegeıli ózgeristerdiń irgetasy bolatynyna senimdimiz.