Qazaqstan Prezıdenti Q.Toqaevtyń halyqqa Joldaýynda birqatar mańyzdy máseleni ortaǵa salǵany kópshiliktiń kókeıinen shyqty. Ásirese, kópten beri kókeıde júrgen, bir kezderi jabylyp qalǵan oblystardy Memleket basshysy qaıta ashý týraly aıtqany júrekjardy jańalyq boldy.
Qazaqstan Parlamentiniń birlesken otyrysyndaǵy Joldaýda kóterilgen jaıttardy jurtshylyq qyzý qoldap, biraýyzdan qýattaǵany baıqalady. Jańa dáýirde Jańa Qazaqstan qurý bastamasy myna máselelerden kórinis tapty.
Aıtalyq, ortalyǵy Semeı qalasy bolatyn Abaı oblysy, ortalyǵy Jezqazǵan shahary bolatyn Ulytaý oblysy, ortalyǵy Taldyqorǵan qalasy bolatyn Jetisý oblysy men ortalyǵy Qapshaǵaı qalasy atanǵan Almaty oblysy barsha jurtqa qut-bereke ákelsin dep tileıik. Bolashaqta Qapshaǵaı shaharynyń ataýy Qonaevqa aýysatyndyǵy Prezıdent Joldaýynda aıqyn kórinis tapty.
Endigi bir kókeıtesti másele, buryn jabylyp qalǵan keı aýdandardy qaıta qalpyna keltirýge basshylyq tarapynan nazar aýdarylsa. Aıtalyq, bir kezderi oblys boıynsha shekaralyq aýdandardy qaıta ashý týraly sheshim qabyldansa tipti oryndy bolar edi.
Bul kúngi Joldaýda el damýyna qatysty jurtshylyq kútken birqatar jáıtter ortaǵa salyndy. Solardyń qatarynda joǵaryda aıtylǵan, jańadan boı kótergen oblystardyń ashylýy Qazaqstan jurtshylyǵy tarapynan qyzý qoldaý taýyp, bolashaqta el damýyna, Jańa Qazaqstannyń órken jaıýyna zor septigin tıgizedi dep úmittenemiz.