Almaty qalasynyń irgesindegi Qaraoı eldi mekeninde shekarashy kınologtardyń halyqaralyq jarysy ótti. Alamandy ótkizýdegi maqsat, esirtki, jarylǵysh zattardy tabýǵa mashyqtandyrylǵan ıtterdiń ıisshildigin sarapqa salý. Kınologtardyń bir-birimen tájirıbe almasýlaryna múmkindik jasaý.
Sonymen, UQK Shekara qyzmeti Qyzmettik kınologıa basqarmasynda ótken saıystyń birinshi kúni jarysqa qatysýǵa nıet bildirgen elderden kelgen komandalardy tanystyrýdan bastaldy. Aıtý kerek, búgingi saıys «BOMCA» – Ortalyq Azıada shekaralardy basqarýǵa járdemdesý baǵdarlamasy aıasynda osymen ekinshi márte uıymdastyrylyp jatyr eken. Onyń birinshi kezeńi bıylǵy jyldyń sáýir aıynda Qyrǵyz elinde ótkizilipti. Ol kezde Qazaqstan, Qyrǵyzstan, Tájikstan, Túrikmenstan jáne Ózbekstan elderiniń kınolog mamandary esirtki zattaryn izdeýdiń qyry men syrlaryn kórsetýge tıis bolatyn. Al, bizdiń elimizde uıymdastyrylǵan saıysta komandalar jarylǵysh zattardy tabýmen birge ádilqazylar alqasynyń nazaryna ózderine bekitilgen qyzmet ıtteriniń «tártibin» pash etedi. Sondaı-aq, búgingi saıysqa bizdiń elden Ulttyq qaýipsizdik komıtetiniń «A» qyzmeti jáne Qazaqstan Respýblıkasy Qarjylyq monıtorıń agentiginiń komandalary da qatysýǵa nıet bildirgen bolatyn.
...Ashylý saltanatynan keıin komandalar «júksalǵyshtar» men ǵımarattarǵa jasyrylǵan naǵyz jarylǵysh zattardy izdeýge kiristi. Al ekinshi kúni avtosynaqqa kezek berildi. Bul jerde qaz-qatar etip qoıylǵan kólikter de «osal» emes, shýly qalanyń gazy men shańyna, janar-jaǵarmaıdyń ıisine ábden bókken. Sondyqtan, ıtterge temir tulparlardyń eń qıyn ári kózden tasa jerlerine jasyrylǵan jarylǵysh zattardy tabý ońaı bola qoımaıdy. Esesine, ózderiniń aram oılaryn ishterine búkken qylmyskerler de dál osyǵan úmit artady – jasyratyn zattaryn ótkir ıisterdiń astyna jasyryp qalýǵa tyrysady. Ne istemeıdi deseńizshi?! Shekaradan alyp ótýge qatań tyıym salynǵan zattardy keıde kofe nemese aıaq kıim kremderiniń arasyna tyǵyp jiberedi, keıde ústine ıissý nemese basqa da ıisi kúshti zattardy seýip tastaıdy. Biraq ıisshildigi keremet damyǵan qyzmet ıtterin munymen aldaý múmkin emes.
– Búgin halyqaralyq jarys erejelerine sáıkes, naǵyz jarylǵysh zattar paıdalanylady. Tek, mólsheri azdaý, bul da komandalarǵa berilgen tapsyrmany qıyndata túsedi, – deıdi UQK Shekara qyzmeti Qyzmettik kınologıa basqarmasy bastyǵynyń orynbasary – shtab bastyǵy podpolkovnık Qýanysh Túmenbaev. Bes eldiń eń myqty degen kınologtary men olardyń qyzmettik ıtteri bul qıyndyqty da eńseredi degen oıdamyn.
Jalpy, «BOMCA» – Ortalyq Azıada shekaralardy basqarýǵa járdemdesý baǵdarlamasy aıasynda uıymdastyrylǵan týrnırdiń joǵary deńgeıde ótýine biz jaýapty bolǵandyqtan, oqý materıaldaryn daıyndaýdan bastap, barlyǵyn qamtýǵa tyrystyq. Shekara qyzmetiniń atynan túskeli turǵan komandaǵa da tek qana «sen tur, men ataıyn» deıtinder irikteldi. Sondyqtan jeńiske qalaı da jetetinimizge senimdimiz.
Aıtpaqshy, ózi de solaı bolǵanyn, úsh kúnge sozylǵan jarystyń ózi de dáleldep bergen. Á-degennen-aq, bizdiń komanda men UQK «A» qyzmeti sýyrylyp alǵa shyqqan. Sosyn Tájik elindegi áriptes shekarashylar myqtylyq tanytqan.
Osylaısha, meniń «Vremá» gazetindegi áriptesim Iýlıa Zeng: «Estrasenster saıysy» dep baǵa bergen tartystan tek myqtylardyń myqtysy ǵana jeńiske jetken. Tipti, úshinshi kúnge belgilengen nomınasıa kezinde de keıbir ıtterdiń qojaıyny bergen buıryqqa qaltqysyz baǵynbaı, tómen baǵa qoıylǵanynyń kýásine aınaldyq. Esesine, UQK Shekara qyzmsetiniń atynan óner kórsetken komanda músheleriniń biri Erqabyl Qusaıynov pen onyń tórt aıaqty dosy Sýrfat qaı jaǵynan da jańylǵan joq edi. Sondyqtan, bizdiń shekarashy halyqaralyq jarystyń absolúttik chempıony atanyp, ózi qyzmet etetin basqarmanyń atyn aspanǵa bir-aq shyǵarǵan.
Sóıtip, 1-shi oryn – QR UQK SHQ Qyzmettik kınologıa basqarmasynyń, 2-shi oryn – QR UQK «A» qyzmeti, 3-shi oryn – Tájikstan elinen kelgen komandanyń qanjyǵasyna baılandy. Ár nomınasıa boıynsha jeńimpaz bolyp tanylǵandar – uıymdastyrýshylardyń sertıfıkaty jáne baǵaly syılyqtarymen marapattaldy.