Qazirgi tańda telefon — tek habarlasyp, hat almasatyn qural ǵana emes. Ol kúndelikti ómirdi jeńildetip qana qoımaı, jańa daǵdylardy úırenýge, paıdaly ádetter qalyptastyrýǵa, tipti ómir saltyńdy ózgertýge múmkindik beretin jeke kómekshige aınaldy.
Búgin biz smartfondy ózińdi damytýǵa baǵyttaı alatyn bes qosymshany nazarlaryńyzǵa usynamyz. Bul qosymshalar — bilim, densaýlyq, tártip pen oı-óris sekildi túrli baǵyttardy qamtıdy.
1. Duolingo nemese LingQ — jańa tilge jol ashý
Ózdiginen til úırengisi keletinder úshin bul qosymshalar taptyrmas kómekshi. Kúnine nebári 5-10 mınýt bólip, jańa sózder úırenip, gramatıkany meńgerip, tildi qoldaný daǵdylaryn qalyptastyrýǵa bolady.
sýret: 3dnews.ru
Duolingo oıyn sıaqty ınterfeısi arqyly motıvasıa berse, LingQ shynaıy mátinder men aýdıolar negizinde til úırenýge kómektesedi. Aǵylshyn, túrik, orys, ıspan sıaqty tanymal tilder qoljetimdi.
2. Strava — belsendi ómirdiń serigi
Júgirý, velosıped tebý, jaıaý serýendeý sıaqty belsendi sport túrlerimen aınalysatyndar úshin Strava qosymshasy óte yńǵaıly. Ol sizdiń jattyǵý baǵytyńyzdy GPS arqyly kartada kórsetip, qashyqtyqty, jyldamdyqty, ýaqytty, tipti kóterilgen bıiktikti de esepteıdi.
Sonymen qatar, basqa qoldanýshylarmen baılanys ornatyp, sporttaǵy jetistiktermen bólisýge de bolady.
3. Headway nemese Blinkist — qysqa ýaqytta úlken bilim
Ýaqyty shekteýli jandarǵa arnalǵan bul qosymshalar tanymal kitaptardyń mazmunyn qysqasha ári naqty túrde usynady. Ár kitaptyń mánin 10–15 mınýtta tyńdap nemese oqyp shyǵýǵa bolady.
Bilim, psıhologıa, ózin-ózi damytý, kóshbasshylyq sıaqty taqyryptardaǵy eńbekterdi kúndelikti azdap oqı otyryp, oı-óristi keńeıtýge múmkindik bar.
sýret: blinkist.com
4. Habitica — paıdaly ádetterdi oıyn túrinde qalyptastyrý
Keı adamdar úshin jospar ustaný qıyn, al mindetti ister tizimin oryndaý jalyqtyrady. Habitica bul máseleni oıyn túrinde sheshedi.
Siz kúndelikti áreketterińizdi “mindet” retinde belgilep, olardy oryndaý arqyly “upaı” jınaısyz, al mindetter oryndalmasa “keıipkerińizdiń” deńgeıi túsip ketedi. Bul tásil motıvasıany arttyryp, ýaqytty tıimdi paıdalanýǵa kómektesedi.
sýret: habitica.fandom.com
5. Meditopia nemese Balance — ishki tynyshtyqqa bet burý
Medıtasıany kúndelikti ómirge engizý — kúızelisti azaıtyp, uıqyny jaqsartyp, ishki tepe-teńdikti qalyptastyrýdyń bir joly.
Bul qosymshalar guided meditation (júrgizýshi daýys arqyly baǵyttaý), tynys alý jattyǵýlary, uıqy aldyndaǵy relaksasıa sıaqty kóptegen fýnksıalardy usynady. Birneshe mınýttyq tynyshtyqtyń ózi úlken áser berýi múmkin ekenin baıqap kórińiz.
sýret: skrınshot
Smartfon — ýaqytty urlaýshy emes, ony durys paıdalansańyz, kerisinshe, damý quraly. Osy qosymshalardyń kez kelgenin óz kún tártibińizge engizý arqyly siz bilimge, tártipke, densaýlyqqa jáne myqty ishki kúıge bir qadam jaqyndaısyz.
Mańyzdysy — az-azdan, biraq turaqty túrde áreket etý. Ózińizdi damytý — bir sáttik emes, úzdiksiz júretin proses ekenin esten shyǵarmańyz.