Almatydaǵy troleıbýs parki qoǵamdyq kólikte sportpen shuǵyldanǵan júrgizýshige fıtnes-ortalyqqa abonoment syılady, dep habarlaıdy almaty-akshamy.kz «Habar 24» silteme jasap.
Park basshylyǵy 55 jastaǵy Asqat Ibraevqa áleýmettik jelilerdegi sýreti arqyly nazar aýdarǵan. Júrgizýshi jumys arasyndaǵy sporttyq jattyǵý qalanyń shýynan sergýge jáne jolaýshylarmen qarym-qatynasty jaqsartýǵa kómektesetinin aıtady.
Beltemirge tartylý – Asqat Ibraevtyń bala kezinen kele jatqan ádeti. "Tartylsam, tezirek ósemin dep oılaıtynmyn", - deıdi júrgizýshi.
Er jetkende sporttyq quraldardy úıine ornatyp alady. Bir orynda uzaq otyrǵannan arqa aýrýy paıda bolatyny ras. Al troleıbýstyń rólinde keshke deıin otyrýǵa týra keledi.
Sondyqtan ol ustaǵysh tutqalardy paıdalanyp, túrli jattyǵýlar jasaýdy ádetke aınaldyrypty.
Asqat Ibraev, troleıbýs júrgizýshisi: – Deni saýdyń – jany saý. Jastar qazir telefon men kompúterden ajyramaıdy. Árıne, elektrondy ǵasyr bolyp tur ǵoı. Degenmen qımyl-qozǵalys kerek.
Sport – Asqat Ibraevtyń bir qyry ǵana. Ol bos ýaqytynda sýret salyp, ańshylyq quraldardy jasaıdy. Onysyn arnaıy satpaıdy. Kóńili qulaǵan adamdar alady eken.