Qaraly habardy tanymal ózbek akteri, rejıser jáne prodúser Azamat Irgashev Facebook paraqshasynda jarıalady, dep habarlaıdy almaty-akshamy.kz
«Búgin saǵat 16.00-de qazaq jáne ózbek aktrısasy Roza Mansurqyzy Ismaılova 84 jasynda aqtyq saparǵa attandy. Ol talantty ártis, kınorejısser Gıas Shermýhamedovtiń súıikti jubaıy jáne eki ulynyń aıaýly anasy bolǵan. Joııngız Jannatda bўlsın, Aloh rahmat qılsın! Amın!», dep jazdy Azamat Irgashev habarlamasynda.
Roza Ismaılova 1937 jyly 14 sáýirde dúnıege kelgen. 1957 jyly «Qazaqfılm» stýdıasynda rejıser Sháken Aımanov pen Aleksandr Karpov túsirgen «Bizdiń súıikti dáriger» kınokomedıasynda basty róldi somdaǵannan keıin tanymal boldy.
Keıin Almaty konservatorıasynda oqyp júrip, «Jerge oralý» (1959) jáne «Splav» (1961) fılmderine tústi. Tashkentte otbasyn qurǵan ártis aktrısalyq mansabyn «Ózbekfılm» kınostýdıasynda jalǵastyrdy. Tashkentte túsirilgen «Almaz beldeýi» (1985) fılmi Roza Ismaılovanyń kıno ónerindegi sońǵy fılm boldy.