AQSH prezıdenti Donald Tramp Ońtústik Koreıadan ımporttalatyn birqatar taýarlarǵa salynatyn kedendik baj salyǵyn 15%-dan 25%-ǵa deıin ósirý týraly sheshim qabyldaǵanyn málimdedi, dep habarlaıdy Aqshamnews.kz tilshisi.
Tramp bul málimdemesin Truth Social jelisindegi paraqshasynda jarıalaǵan. Onyń aıtýynsha, Seýldiń zań shyǵarýshy organy AQSH-pen jasalǵan saýda kelisimin áli kúnge deıin ratıfıkasıalamaǵan.
Aqparatqa sáıkes, baj salyǵy avtokólikter, aǵash materıaldary, farmasevtıkalyq ónimder jáne ózge de taýarlarǵa qatysty bolýy múmkin.
Al Ońtústik Koreıa prezıdenti ákimshiligi AQSH úkimetinen ázirge resmı habarlama nemese túsindirme almaǵanyn aıtyp, jaǵdaıdy naqtylaý úshin konsýltasıalar júrgizýge nıetti ekenin jetkizdi.