Ál-Farabı atyndaǵy Qazaq ulttyq ýnıversıteti jýrnalısıka fakúltetiniń IýNESKO-nyń jýrnalısıka jáne komýnıkasıa kafedrasynyń uıymdastyrýymen 2026 jyldyń 26 qańtarynda Almaty qalasy «Taý-Turan» demalys bazasynda BUU-nyń halyqaralyq bilim berý kúnine oraılastyrylǵan «Turaqty damý múddesindegi bilim: jahandyq jáne ınovasıalyq prosester» atty VI halyqaralyq jahandyq jýrnalısıka jáne shyǵystaný qysqy mektebiniń ashylý saltanaty ótti.
Halyqaralyq sharaǵa ýnıversıtet basshylyǵy, fakúltettiń profesor-oqytýshylary, sheteldik ǵalymdar, «Euronews TV» men BBC WORLD telearnasynyń burynǵy jýrnalıseri, elimizdiń tanymal «Alatau-Aqparat» medıa holdıńiniń Bas dırektory Erjan Qalymbaıuly, Mega komýnıkasıalar jelisiniń dırektory Imanalıeva Madına, «HeadHunter»-diń Ortalyq Azıadaǵy marketıń jáne PR menedjeri Muhamed Baǵdatuly jáne Ońtústik Koreıanyń Sýngshın ýnıversıtetiniń (Seýl) stýdentteri qatysty.
Sharany jýrnalısıka fakúltetiniń dekany Qanat Áýesbaı ashyp, qysqy mektepke osy jyly alǵash ret sheteldik stýdentterdiń qatysyp otyrǵanyn atap ótti.
Baǵdarlama aıasynda qazirgi tańdaǵy jahandyq komýnıkasıanyń damý baǵyttary jáne osy oraıda ulttyq mass-medıanyń zamanaýı syn-qaterlerge tózimdiligi týraly máseleler jan-jaqty taldandy.
BBC World telearnasynyń burynǵy jýrnalısi, medıa jáne komýnıkasıa profesory Muhammad Sheraz álemdik deńgeıdegi qoǵamdyq jáne memlekettik telearnalardyń nasıhat júrgizýdegi ádis-tásilderi jáne aqparattyq saıasattary týraly naqty derekterge toly áńgime aıtty. Al, Ońtústik Koreıa eliniń Qazaqstandaǵy “KazKorean» gazetiniń tilshisi Jang Vonkı myrza sheteldikterdiń bizdiń elimiz týraly alǵan áserleri jáne qandaı pikirlerdi jıi aıtatyny týraly qyzyqty prezentasıa jasady.
“Alatau Aqparat” medıaholdınginiń bas dırektory Erjan Tólek dástúrli BAQ pen saıttardyń áleýmettik jelidegi damýy, medıa marketıń, tıraj máselelerin kóterip, qazirgi aqparat keńistigindegi jańashyl kózqarastaryn bólisti.
Al MEGA komýnıkasıalar jelisiniń dırektory Madına Imanalıeva pıar salasy mamandaryna qajetti ádet-daǵdylardy mysaldarmen dáleldeı kelip, jýrnalısıka fakúlteti jas mamandarǵa naqty ne beredi jáne ne bermeıdi degen saýaldardy alǵa tartyp, óziniń tájirıbesi negizinde jaýap berdi. Sonymen qatar shara barysynda “HeadHunter”-diń Ortalyq Azıadaǵy marketıń jáne PR menedjeri Muhamed Baǵdatuly qarjy, HR salasyndaǵy PR mamandardyń jumys isteýindegi erekshelikter týraly qundy oılaryn bólisti.
Shyǵystaný fakúlteti, Qıyr Shyǵys kafedrasynyń meńgerýshisi Aqerke Abaǵan Ortalyq Azıa týraly koreı halqynyń kózqarasy jáne Qazaqstan mádenıetiniń shetelderde nasıhattalýy týraly óz oıyn ortaǵa saldy. Al, IýNESKO-nyń jýrnalısıka jáne komýnıkasıa kafedrasynyń meńgerýshisi Oryntaı Oshanova turaqty damý maqsatynda jýrnalısik bilim berýdiń jańa mindetteri men qoǵam rólinde atqarar mańyzdy qyzmetteri týraly pikirin bólisti.
Shara barysynda elimizdiń bilim naryǵyna qajetti PR jáne komýnıkasıa mamandaryn daıarlaýdyń ózekti máseleleri týraly fakúltettiń jumys berýshileri óz usynystarymen bólisti.
Tórt tilde, ıaǵnı qazaq, orys, aǵylshyn jáne koreı tilderinde ótken qysqy mektep qatysýshylarǵa halyqaralyq tájirıbe almasýǵa, kóptildi ortada erkin pikir almasýǵa múmkindik berdi.
