26 jáne 27 qańtar kúnderi Almaty qalasynda Dúnıejúzilik saılaý kúnine oraı birqatar is-sharalar ótti. Eki kún ishinde qalanyń aýmaqtyq saılaý komısıalary ár túrli formattaǵy 16 is-shara – semınarlar, dárister, pikirtalastar, dóńgelek ústelder men ınteraktıvti kezdesýler uıymdastyryp, jalpy sany 825 adamdy qamtydy. Onyń ishinde 626-sy – jastar.
Barlyq is-sharalar «Elektoraldy qaǵıdattar – saılaýshy seniminiń negizi» uranymen ótip, zań ústemdigi, saılaý quqyǵy, azamattyq jaýapkershilik jáne elektoraldy mádenıetti damytý máselelerine arnaldy.
Alǵashqy kúni qalanyń barlyq aýdandarynda ýchaskelik saılaý komısıalary músheleriniń quqyqtyq saýatyn arttyrýǵa baǵyttalǵan oqytý semınarlary men dárister, sondaı-aq oqýshylar men stýdentterge arnalǵan saılaý zańnamasynyń negizderi jáne adal ári ashyq saılaý qaǵıdattary jónindegi taqyryptyq kezdesýler ótti.
Ekinshi kúni jastarmen jumys isteýdiń ınteraktıvti formattaryna basymdyq berildi. Megapolıstiń bilim berý uıymdarynda qonaq dárister, pikirtalas, dóńgelek ústelder jáne shyǵarmashylyq baıqaýlar uıymdastyrylyp, onyń barysynda qatysýshylar jeke tańdaýdyń mańyzyn, azamattyq ustanymdy qalyptastyrý joldaryn jáne saılaýǵa qatysýdyń el bolashaǵyna yqpalyn talqylady.
«Mundaı bastamalar quqyqtyq saýattylyq deńgeıin arttyryp qana qoımaı, jastarmen turaqty ári nátıjeli dıalog ornatýǵa múmkindik beredi, sonymen qatar belsendi ári sanaly bolashaq saılaýshylar býynyn qalyptastyrady», – dep atap ótti Almaty qalasynyń aýmaqtyq saılaý komısıasynda.
Ótkizilgen is-sharalar qatysýshylardyń quqyqtyq mádenıetin nyǵaıtýǵa, azamattyq belsendilikti damytýǵa jáne saılaý úderisine jaýapkershilikpen qaraý kózqarasyn qalyptastyrýǵa yqpal etti.