Almatyda ótken bul forým halyqaralyq saýda jáne ekonomıkalyq yntymaqtastyq salasynyń bolashaǵy men jańa trendterdi talqylaýǵa nıet bildirgen saýda jáne logıstıka salasyndaǵy jetekshi bıznes ókilderiniń, sondaı-aq qarjy uıymdarynyń, memlekettik organdar ókilderiniń basyn qosty.
İs-shara Konsaltıńtik jáne saýda kompanıalarynyń qaýymdastyǵy, Almaty qalasynyń «Atameken» kásipkerler palatasy, Qazaqstannyń syrtqy saýda palatasy, Consulting Group DASCO uıymdastyrýymen ótti. TRADEX 2024 forýmy – Qazaqstannyń Ortalyq Azıanyń negizgi saýda haby, Eýropa men Azıa arasyndaǵy kópiri retindegi ustanymyn nyǵaıtýdyń jarqyn kórinisi. Almaty qalasy elimizdiń iri qarjy-ekonomıkalyq, kóliktik jáne saýda ortalyǵy retinde iskerlik baılanys ornatýǵa, halyqaralyq saýdanyń ózekti máselelerin talqylaýǵa kómektesetin osy syndy forýmdardy ótkizýde eń yńǵaıly alań ekeni ras. Ulttyq ekonomıka mınıstrligi Qoǵamdyq keńesiniń tóraǵasy Dármen Sádýaqasov saýdany el ekonomıkasynyń eń iri sektory dep atady.
«Qazaqstanda saýda salasynda 818 myń sýbekt jumyldyryldy. Bul búkil otandyq bıznestiń shamamen 35 %-yn quraıdy. Tıisinshe, saýda salasy eń kóp jumys oryndaryn qamtıdy. 2024 jyldyń III toqsanynda shyǵarylǵan saraptamaǵa saı, 1,5 jarym mıllıonnan astam adam osy salada tabys tabýda. Bul kórsetkish – eńbek naryǵynyń 16,7 %-y», – dep atap aıtty mınıstrliktiń Qoǵamdyq keńes tóraǵasy D. Sádýaqasov
Sońǵy jyldary erekshe serpinge syrtqy saýda ıe boldy. QHR Bas konsýly Szán Veı atap ótkendeı, ótken jyly Qytaı men Ortalyq Azıanyń bes eliniń arasyndaǵy taýar aınalymy 90 mlrd. amerıkan dollaryn qurady. Bul rette sol somanyń jartysy – Qazaqstanǵa tıesili.
«Atameken» palatasy ekinshi jyl qatarynan Central Asian Trade Expo forýmynyń uıymdastyrýshylary qatarynda. Bul – bizdiń halyqaralyq arenada Almaty men Qazaqstan kásipkerleriniń múddesin qoldaýǵa, ilgeriletýge qosqan úlesimiz. Biz kásipkerlerge jańa naryqqa shyǵýǵa, seriktes tabýǵa, kelisimshartqa qol qoıýǵa kómektesý úshin bıznes-qoǵamdastyqpen belsendi jumys isteımiz. TRADEX forýmynda biz óńirdegi bıznesti damyt men bıznes-ortany jaqsartýǵa baǵyttalǵan birqatar bastama usyndyq», – dep atap ótti Almaty qalasynyń «Atameken» ÓKP dırektorynyń shaǵyn kásipkerlik jáne halyqaralyq yntymaqtastyqty damytý jónindegi orynbasary Aqerkin Eralıeva.