Búgin qalalyq sýburqaqtarǵa arnalǵan pres-týr ótti. Qaladaǵy tarıhı mańyzǵa ıe sýburqaqtarǵa jasalǵan pres-týrdy Almaty qalasy Qoǵamdyq keńistikterdi damytý basqarmasynyń uıymdastyrǵan bolatyn.
Onda BAQ ókilderi alǵash ret jer astyndaǵy tehnıkalyq bólmelerdi aralap, eski ınfraqurylymmen jáne josparlanǵan jóndeý jobalarymen tanysty.
Komýnaldyq menshiktegi tórt iri sýburqaq – Shyǵys jáne Batys sýburqaqtary, Respýblıka alańyndaǵy basty sýburqaq jáne Ǵ.Músirepov atyndaǵy balalar men jasóspirimder teatry aldyndaǵy sýburqaq ta bıyl alǵash ret keshendi rekonstrýksıadan ótedi.
Qalalyq Qoǵamdyq keńistikterdi damytý basqarmasy basshysynyń orynbasary Batyrhan Súleımenovtiń aıtýynsha, jobanyń bastapqy quny 8 mlrd teńgeni qurasa, keıinnen Almaty qalasynyń ákimi Erbolat Dosaevtyń tapsyrmasymen shyǵyndar ońtaılandyrylyp, soma 6 mlrd teńgege deıin qysqartylǵan. Memlekettik satyp alý nátıjesi boıynsha kelisimshart 5,130 mlrd teńgege jasalyp, únem 3 mlrd teńgeni qurady.
– Qurylys shyǵyndarynyń 65-70 paıyzy qurylys-montaj jumystary men zamanaýı eýropalyq jabdyqtarǵa jumsalady. Sýburqaqtar úshin ıspandyq Fluidra kompanıasynyń, sondaı-aq Germanıa men Italıada óndirilgen sapaly qurylǵylar qoldanylady. Jabdyqqa 5 jyldyq kepildik pen 3 jyl tehnıkalyq qyzmet kórsetý qarastyrylǵan, al qyzmet etý merzimi – 15 jyl», — dedi Batyrhan Aıbatuly.
Jóndeý jumystary barysynda gıdrooqshaýlaýdy jańartý, ınjenerlik jelilerdi aýystyrý, avtomattandyrylǵan basqarý júıesin engizý, jaryqtandyrý, sorǵy jáne súzý júıelerin tolyqtaı jańǵyrtý josparlanǵan. Sýburqaqtardaǵy sý tazartý prosesi hlordyń ornyna belsendi ottegi generatory arqyly júrgiziletin bolady.
Sýburqaqtardyń tarıhı jáne sáýlettik erekshelikterin saqtaý jobanyń basty basymdyǵy. Granıt plıtalary men tabıǵı tastar burynǵy qalpynda qaldyrylyp, estetıkalyq beınesi saqtalady.
Tehnıkalyq qyzmet kórsetýdi júzege asyratyn «Eko Almaty» JSHS dırektorynyń orynbasary Rústem Muhametjanov qazirgi tańda qalalyq 66 sýburqaqqa qyzmet kórsetiletinin atap ótti.
«Biz sýburqaqtardyń sanıtarlyq jaǵdaıyn, tehnıkalyq júıelerin, sý tazalaý jáne konservasıalaý jumystaryn júrgizemiz. Qazirgi tańda 45 qyzmetker, sonyń ishinde 8 elektrık, 7 santehnık pen dánekerleýshi jumys isteıdi. Jóndeý aıaqtalǵannan keıin de biz qyzmet kórsetýdi jalǵastyramyz», — dedi ol.
Joba ınjenerlik ınfraqurylymdy jańartyp qana qoımaı, tarıhı kelbetti saqtaýǵa da basymdyq beredi. Jańartý jumystary sáýir aıynda bastalyp, qazan aıynda – Almaty kúnine deıin aıaqtalady dep josparlanýda. Osylaısha jańartylǵan sýburqaqtar Almaty turǵyndary men qonaqtary úshin zamanaýı demalys ornyna aınalady.
«Aqshamnyń» anyqtamasy:
Qaıta jańǵyrtylyp jatqan sýburqaqtardyń barlyǵy da Almaty qalasynyń mańyzdy sáýlettik nysandarynyń quramdas bóligi bolyp tabylady. Shyǵys jáne Batys sýburqaqtary men Respýblıka alańyndaǵy sýburqaqtar 1979 jyly, al Ǵ.Músirepov atyndaǵy teatr aldyndaǵy sýburqaq 1962 jyly salynǵan. Buǵan deıin olarǵa tek kosmetıkalyq jóndeýler júrgizilgen.
