Óte qymbat kólikterge jeńildetilgen avtokredıt berilmeıdi.
4 paıyzdyq avtonesıeleý baǵdarlamasy aıasynda 10 mıllıon teńgege deıingi kólikti rásimdeýge ruqsat beriledi, dep habarlaıdy Almaty-akshamy.kz
Al odan qymbat bolsa, qajetti somany rásimdep, ústinen tóleýge múmkindik bar.
Bul týraly Indýstrıa jáne ınfraqurylymdyq damý vıse-mınıstri Marat Qarabaev aıtty.
«Búgin tańerteń jeńildetilgen avtokredıt tek belgili bir modelderge ǵana beriledi degen aqparatty kórdik. Bul – feık aqparat. Baǵdarlama boıynsha 10 mıllıon teńgege deıin nesıe beriledi. Al alyp jatqan kóligińiz odan qymbat bolsa, siz 10 mıllıonnyń ústinen qajetti somany óz qaltańyzdan tóleısiz», - dedi Qarabaev Ortalyq komýnıkasıalar qyzmetinde ótken brıfıńte.
Vıse-mınıstrdiń aıtýynsha, óte qymbat kólikterge jeńildetilgen avtonesıe berilmeıdi.
«Avtonesıe barlyq modelderge beriledi. Biraq eń qymbat modelder bar. Mysaly, Hyundai Palisade sıaqty kólikter satylady. Ondaı kólikterge jeńildetilgen nesıe berilmeıdi. 25 mıllıonǵa jaǵdaıy bar kisiler óz aqshasyna alsyn», - dep atap kórsetti Qarabaev.