Qazaqstan Prezıdenti Túrki memleketteri uıymynyń XII samıtine qatysty, dep habarlaıdy Aqshamnews.kz tilshisi Aqordaǵa silteme jasap.
Qazaqstan Prezıdenti arnaıy Sıfrlyq monıtorıń ortalyǵyn qurýdy usyndy. Óz sózinde Qasym-Jomart Toqaev Ázerbaıjan Prezıdenti Ilham Álıevke qonaqjaılyǵy úshin rızashylyǵyn bildirip, búgingi samıttiń kún tártibiniń aıryqsha mańyzy men ózektiligin atap ótti.
"Túbi bir túrki jurtynyń tarıhy – tamyrlas, halyqtarymyzǵa ortaq san ǵasyrlyq shejiremiz bar dep únemi aıtyp jatyrmyz. Munyń bári – berekeli birligimiz ben máńgilik yntymaǵymyzdyń altyn arqaýy. Jaqynda elderimiz «Túrki halyqtarynyń yntymaqtastyq kúnin» atap ótti. Bul – birligimizdi bekemdeı túsetin mańyzdy mereke. Búginde Túrki memleketteri uıymy dostas halyqtardyń basyn qosqan mártebeli ári bedeldi qurylymǵa aınaldy. Byltyrdan beri Uıymǵa qurmetti Prezıdent Sadyr Japarov bastaǵan qyrǵyz eli tıimdi tóraǵalyq etti. Qyrǵyz tarapyna rızashylyǵymyzdy bildiremiz. Endi tóraǵalyq qurmetti Ilham Geıdar oglýdyń basshylyǵymen Ázerbaıjan tarapyna beriledi. Aldaǵy ýaqytta da Uıymymyzdyń abyroı-bedeli arta túsedi dep senemiz", – dedi Prezıdent.
Memleket basshysy jahandyq qaýipsizdik júıesi kúrdeli kezeńdi bastan ótkerip jatqanyn atap ótip, qaqtyǵystar men shıelenister, geosaıası teketirester álemniń kez kelgen memleketine áser etetin qaýipti úrdiske aınalǵanyna toqtaldy.
"Osyndaı almaǵaıyp zamanda 30 jyldan astam ýaqyt sheshimin tappaǵan shıeleniske qatysty Ázerbaıjan men Armenıanyń Beıbitshilik deklarasıasyna qol qoıǵanyn erekshe atap ótkim keledi. Bul turaqtylyq pen ekonomıkalyq órleýge jol ashatyn tarıhı mámile boldy. Qazir álemdegi geosaıası ahýal asa kúrdeli, sondyqtan túrki elderi ortaq múdde jolynda kúsh jumyldyrýǵa tıis. Búginde jahan jurty bizdi zor syn-qaterlerge tótep bere alatyn, bedeli myqty, yntymaǵy jarasqan memleketter retinde tanıdy. Birqatar el bizdiń Uıymǵa erekshe qyzyǵýshylyq tanytýda. Bul rette Qazaqstan yntymaqtastyq aıasyn keńeıtýge baǵyttalǵan «Túrki memleketteri uıymy+» formatyn qurý ıdeıasyn qoldaıdy. Osy bastama bizdiń Uıymnyń halyqaralyq bedelin arttyrýǵa jol ashatyny sózsiz", – dedi Qasym-Jomart Toqaev.