Qasym-Jomart Toqaev Túrki memleketteri uıymynyń Sıfrlyq ınovasıalar ortalyǵyn qurýdy usyndy, - dep habarlaıdy Aqshamnews.kz tilshisi Aqordaǵa silteme jasap.
Prezıdent Qazaqstan sıfrlandyrý isine, sonyń ishinde jasandy ıntellekt salasyn damytýǵa erekshe mán beretinin málimdep, tolyq sıfrlyq el bolýdy strategıalyq maqsat retinde aıqyndaǵanyn jetkizdi.
"Jasandy ıntellektini jappaı damytý úshin bilikti mamandar daıarlaýdy qolǵa aldyq. Baǵdarlama aıasynda jyl basynan beri 400 myńnan astam stýdent arnaıy bilim aldy. Sondaı-aq jasandy ıntellekt mamandaryn oqytatyn tuńǵysh zertteý ýnıversıtetin ashýdy josparlap otyrmyz. Qazaqstan osy oqý ordasynda bilim alýǵa nıet bildirgen túrki elderiniń jastaryna arnaıy granttar bólýge daıyn", – dedi Memleket basshysy.
Budan bólek, Qasym-Jomart Toqaev atalǵan salalar boıynsha Uıym aıasynda júzege asyrýǵa bolatyn birqatar bastamaǵa toqtalyp ótti.
"Jýyrda Astanada Alem.Ai jasandy ıntellekt ortalyǵy ashyldy. Sonyń negizinde Túrki memleketteri uıymynyń Sıfrlyq ınovasıalar ortalyǵyn qurýdy usynamyz. Bul Ortalyq startaptardy qoldap, birlesken jobalardy damytýǵa jol ashady. Jasandy ıntellekt salasynda tájirıbe almasýǵa jáne venchýrlik kapıtal tartýǵa múmkindik beredi. Biz sıfrlandyrý jáne jasandy ıntellektiniń áleýetin halyqtarymyzdyń ıgiligi úshin utymdy paıdalanýymyz qajet. Sonymen qatar jańa tehnologıalardan týyndaıtyn táýekelder men syn-qaterlerdiń aldyn alýymyz kerek. Sondyqtan kelesi jyly Qazaqstanda ótetin Uıymnyń beıresmı samıtin «Jasandy ıntellekt jáne sıfrlyq damý» taqyrybyna arnaýdy usynamyn. Osy jıynnyń qarsańynda bilikti sarapshylardyń basyn qosyp, halyqaralyq konferensıa uıymdastyrýǵa daıynbyz", – dedi Prezıdent.