Elimizde kóp adam nesıe alyp, qaryzǵa batyp júr.
Memleket basshysy Qasym-Jomart Toqaev jaqyn arada nesıege qatysty usynysyn jarıa etetinin málimdedi, dep habarlaıdy Almaty-akshamy.kz Aqordaǵa silteme jasap.
«Men taǵy bir kúrdeli máselege toqtalǵym kelip otyr. Elimizde kóp adam nesıe alyp, qaryzǵa batyp júr. Bul másele meni de qatty tolǵandyrady. Taıaý arada men osy másele boıynsha usynysymdy halyqqa jarıalaımyn», - dedi Prezıdent Jetisý oblysynyń jurtshylyǵymen kezdesýinde.
Toqaev memlekettik qyzmetshilerden ádil bolýdy talap etti.
«Shyn máninde, ádildik bolmasa, eshbir sala damymaıdy. Halqymyz «Ádil istiń – bári ıgi» dep beker aıtpaǵan. Quzyrly organdar, laýazymdy tulǵalar sheshim qabyldaǵanda, osyny árdaıym este ustaýy tıis.
Ádiletsiz qabyldanǵan sheshim bıliktiń bedelin túsiredi. Qoǵamǵa iritki salyp, halyqtyń narazylyǵyn týdyrady. Sondyqtan, eshqashan ádildikten attaýǵa bolmaıdy. Barlyq memlekettik qyzmetshiden ádil bolýdy talap etemin. Sonda ǵana biz berekeli qoǵam, myqty memleket bolamyz», - dedi Memleket basshysy.
Aıta ketetin jaıt, 20 qazan kúni Qazaqstan Prezıdenti Qasym-Jomart Toqaev jumys saparymen Jetisý oblysyna bardy. Memleket basshysy sapar barysynda óńir halqymen kezdesti.