Prezıdent Toqaev "Shveısarıa – Qazaqstan" parlamenttik dostyq tobynyń múshelerin qabyldady, dep habarlaıdy Aqshamnews.kz Aqordanyń habarlamasyna silteme jasap.
Kezdesý barysynda Prezıdent Qazaqstan Eýropadaǵy ýaqyt tezinen ótken senimdi seriktesi sanalatyn Shveısarıamen uzaq jyldardan beri qalyptasqan qarym-qatynasqa erekshe mán beretinin atap ótti.
"Qasym-Jomart Toqaev 2021 jyly Shveısarıaǵa jasaǵan resmı sapary eki el arasyndaǵy seriktestikti nyǵaıtýǵa berik negiz qalaǵanyna nazar aýdardy. Memleket basshysynyń aıtýynsha, shveısarıalyq depýtattar delegasıasynyń elimizge kelýi jan-jaqty yqpaldastyqty odan ári damytýǵa qos taraptyń da nıetti ekenin kórsetedi", - delingen habarlamada.
Bul rette ózara túsinistikti nyǵaıtyp, ekijaqty yntymaqtastyqty jandandyrýda parlamenttik dıplomatıanyń mańyzdy ról atqaratynyna mán berildi.
"Shveısarıa – Qazaqstan" parlamenttik dostyq tobynyń úılestirýshisi Fılıppo Lombardı qonaqjaılyq tanytqany úshin Memleket basshysyna alǵys aıtyp, Shveısarıanyń seriktestik baılanystardy keńeıtýge jáne birlesken bastamalardy júzege asyrýǵa múddeli ekenin jetkizdi.
Kezdesýde Astana men Bern arasyndaǵy saýda-ınvestısıalyq yntymaqtastyq perspektıvasy, sondaı-aq halyqaralyq uıymdar aıasyndaǵy is-áreketterdi ózara úılestirý máseleleri talqylandy.