Memleket basshysy Qasym-Jomart Toqaev Ózbekstan prezıdenti Shavkat Mırzıóevpen telefon arqyly sóılesti, - dep habarlaıdy Aqshamnews.kz tilshisi.
Memleket basshysy Ózbekstan Prezıdentin týǵan kúnimen quttyqtap, onyń baýyrlas ózbek halqynyń ıgiligi jolynda atqaryp jatqan jaýapty memlekettik qyzmetine tolaıym tabys tiledi.
Qasym-Jomart Toqaev Shavkat Mırzıóevtiń bedeldi kóshbasshylyǵynyń arqasynda Ózbekstan damýdyń dańǵyl jolyna túsip, áleýmettik-ekonomıkalyq salada eleýli jetistikke jetkenin atap ótti.
Áńgimelesý barysynda eki el arasynda senimge, tatý kórshilik baılanystarǵa ári ózara qoldaýǵa negizdelgen strategıalyq jáne odaqtastyq qatynastar qalyptasqanyna nazar aýdaryldy. Saýda-ekonomıkalyq, mádenı-gýmanıtarlyq yntymaqtastyq pen ǵylym-bilim salasyndaǵy seriktestik nyǵaıyp keledi.
Qasym-Jomart Toqaevtyń aıtýynsha, búkil Orta Azıanyń ornyqty damýy kóbine eki memlekettiń ózara yqpaldastyǵyna tikeleı baılanysty. Osyǵan oraı taraptar ónerkásip, energetıka, kólik, logıstıka jáne aýyl sharýashylyǵy baǵyttaryndaǵy birlesken jobalardy ilgeriletý úshin naqty sharalar qabyldap jatyr.
Qasym-Jomart Toqaev pen Shavkat Mırzıóev óńirlik kooperasıanyń ózekti máseleleri jóninde pikir almasyp, ekijaqty formatta jáne halyqaralyq is-sharalar aıasynda josparlanǵan joǵary deńgeıdegi kezdesýler kestesin qarastyrdy.