Úkimet járdemaqylarǵa qatysty suraqqa jaýap berdi, - dep habarlaıdy Aqshamnews.kz tilshisi.
Jýrnalıster járdemaqyny 6 sanatqa bólip jatqanyna qatysty suraq qoıdy.
"Respýblıkalyq búdjetten 41 áleýmettik tólemder jasady. Biraq júrip jatqan joba oǵan áser etpeıdi. Odan bólek jergilikti atqarýshy organdarda mektepte tamaqtandyrý, jataqhanadan bólme berý sıaqty 11 qosymsha memlekettik qoldaý kóresetiledi. Qazir biz osy kómekterdi sıfrlandyryp jatyrmyz. Ondaǵy maqsat - memlekettik qoldaý naqty muqtaj otbasylarǵa berilýi kerek. Munda 6 klaster belgilengen. Máselen, tótenshe qajettilik, jáı qajettilik, salystyrmaly turaqtylyq dep kete beredi. Eń sońǵy 6-klaster mundaı kómekke muqtaj emes otbasylar sanatyn bildiredi, ıaǵnı, joǵary ál-aýqatty dep aıqyndalady da, olar memlekettik qoldaýdy almaıdy. Sondyqtan mundaǵy ózgerister tek memlekettik qosymsha qoldaýǵa qatysty jasalyp jatyr. Úrdister sıfrlandyrý jáne barlyq ýákiletti organdardyń biryńǵaı platformada jumys isteýi maqsatynda", — dep jaýap berdi eńbek jáne halyqty áleýmettik qorǵaý birinshi vıse-mınıstri Asqarbek Ertaev.
Ony premer-mınıstrdiń orynbasary Ermek Kósherbaev tolyqtyrdy. Ol mundaǵy maqsat - eń birinshi áleýmettik ádildikti ornatý, ekinshi áleýmettik alaıaqtyqty toqtatý ekenin atap ótti.
"Ózińiz bilesiz, bizde memlekettik organdar bar, ortalyq nemese jergilikti organdar bolsyn sıfrlandyrý aıaǵyna deıin jetkizilmegen. Kimniń ne istep jatqanyn bazasy arqyly teksere almaımyz. Kóp nárseni qaǵazben alyp keledi. Ony joba boıynsha teksergende birqatar máseleler anyqtalyp jatady. Mysaly,bir otbasy jaǵdaıy qıyn dep sanalyp, jergilikti búdjetten, ortalyq búdjetten jáne saqtandyrý qorynan da aqsha alyp otyrǵan. Al ony qalaı istegen? Áýelde ony bireý "úıi joq, mashınasy joq, kóp balaly otbasy" dep jazyp bergen. Ony aparyp HQKO arqyly tirkegen. Al sıfrlandyrý júrip birte-birte derekter bazasy bir birine qosylǵanda olardyń eki qabatty úıi bar, eki mashınasy bar ekeni anyqtalǵan. Kóptegen turmystyq tehnıka alǵan nesıeleri bolǵan. Mine, mundaǵy maqsat osyndaı jaǵdaılarǵa jol bermeý, sıfrlandyrý jáne sol aqyly ońtaılandyra otyryp, alaıaqtyqqa bol bermeý", — dedi ol.