Qasym-Jomart Toqaev otandyq shahmat sheberleriniń halyqaralyq arenadaǵy jetistikterine joǵary baǵa berdi
Memleket basshysy Qazaqstan shahmat federasıasynyń prezıdenti Tımýr Týrlovty qabyldady. Kezdesý barysynda elimizde shahmatty damytý máseleleri talqylandy, dep habarlaıdy Almaty-akshamy.kz.
Aqordanyń resmı saıtynyń jazýynsha, Qasym-Jomart Toqaevqa jýyrda Qazaqstanda Halyqaralyq shahmat federasıasymen (FIDE) birlesip uıymdastyrylǵan halyqaralyq týrnırlerdiń qorytyndysy jóninde málimet berildi.
Tımýr Týrlov fedarasıanyń aldaǵy kezeńge arnalǵan jospary týraly aıtty. Atap aıtqanda, federasıa elimizdegi shahmat seksıalarynyń sanyn 2 ese, ıaǵnı 7 myńnan 14 myńǵa deıin ulǵaıtýdy, shahmatty odan ári dáripteý jumystaryn jalǵastyrýdy, osylaısha zıatkerlik ult qalyptastyrýǵa úles qosý jónindegi Prezıdent tapsyrmalaryn oryndaýdy kózdeıdi. Sondaı-aq federasıa Qazaqstan quramasy kóshbasshylarynyń áleýetin tanytýdy, jańa chempıondardy tárbıelep shyǵarýdy maqsat etip otyr.
Memleket basshysyna álem chempıony ataǵy úshin bıyl 7 sáýir men 1 mamyr aralyǵynda Astanada ótetin shahmat jarysyna daıarlyq barysy týraly baıandaldy.
Qasym-Jomart Toqaev otandyq shahmat sheberleriniń halyqaralyq arenadaǵy jetistikterine joǵary baǵa berdi. Onyń aıtýynsha, elimizde álemniń úzdik shahmatshylarynyń qatysýymen iri jarystar uıymdastyrý balalar men jastar arasynda osy sport túriniń tanymaldylyǵyn arttyrýǵa yqpal etedi.