Qor 10 qaıyrymdylyq baǵdarlama men jobany júzege asyryp jatyr
Memleket basshysy Qasym-Jomart Toqaev "Qazaqstan halqyna" qorynyń tóraǵasy Bolat Jámishevti qabyldady, dep habarlaıdy Almaty-akshamy.kz Aqorda saıtyna silteme jasap.
Prezıdentke Qordyń azamattarǵa kórsetken kómegi boıynsha esebi, sondaı-aq qaıyrymdylyq qyzmetti uıymdastyrý joldary jóninde aqparat berildi.
Bolat Jámishevtiń aıtýynsha, qazirgi tańda Qor 10 qaıyrymdylyq baǵdarlama men jobany júzege asyryp jatyr. Atap aıtqanda, olardyń segizi medısınalyq kómek kórsetýge, bireýi aýyl balalary úshin sport salasyndaǵy áleýmettik jaǵdaıdy jaqsartýǵa baǵyttalsa, taǵy biri aýyldyq jerlerden shyqqan talapkerler men az qamtylǵan otbasylardyń stýdent balalaryna bilim granttaryn berýdi qarastyrady.
Qasym-Jomart Toqaev Qordyń maqsatty baǵyttaryn anyqtaýǵa qoǵam men qoǵamdyq ınstıtýttardy belsendi túrde tartý qajet ekenine basa mán berdi.
Bolat Jámishevtiń aıtýynsha, Qor jańadan tolyqtyrylǵan Tujyrymdamany jáne Qaıyrymdylyq baǵytyndaǵy baǵdarlamalar men jobalar ázirleýdi qolǵa aldy. Bul jumysqa komersıalyq emes sektordyń ókilderi, máslıhat depýtattary, Qor mesenattary bolyp tabylatyn bıznes ókilderi men sarapshylar keńinen tartylady.
Qor tóraǵasynyń aıtýynsha, barlyq atqarylyp jatqan jumystar týraly tolyq aqparat qoǵam nazaryna usynylady. Qyrkúıek aıynda ótetin Ulttyq qaıyrymdylyq konferensıasy osy ýaqyt aralyǵynda atqarylǵan jumystyń qorytyndy esebi bolmaq.