Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde "Qaýipsiz qala" ulttyq platformasyn iske qosý keregin aıtty, - dep habarlaıdy aqshamnews.kz tilshisi.
Prezıdent sózinshe, jyl basynan beri Prezıdent Ákimshiligine dál osyndaı, ıaǵnı sotaldy is júrgizý máselesi boıynsha úsh myń shaǵym kelip túsken. Sondyqtan sıfrlyq tehnologıanyń múmkindigin tıimdi paıdalaný qajet.
"Mysaly, qazir elimizde iske qosylǵan "Zań men tártip" platformasyn Elektrondy úkimet pen tanymal bank qosymshalary arqyly qoldanýǵa bolady. Osy sıfrlyq platformanyń arqasynda azamattarymyz polısıaǵa tikeleı jáne jedel túrde habarlama joldaı alady. Osylaısha, kez kelgen quqyq buzýshylyqqa "múldem tózbeýshilik" qaǵıdatyn is júzinde júzege asyrýǵa yqpal etedi.
Men Aqtóbe oblysyna saparym kezinde Jedel basqarý ortalyǵynda boldym. Ortalyqta jasandy ıntellektiniń kómegimen qaladaǵy ahýalǵa táýlik boıy beınebaqylaý júrgiziledi. Polısıa qyzmetiniń tıimdiligin arttyratyn osyndaı ortalyqtardy elimizdiń barlyq qalasy men aýdanynda ashý qajet. Ákimder bul jumysqa belsendi túrde kirisýge tıis.
Budan bólek, "Qaýipsiz qala" ulttyq platformasyn iske qosý kerek. Bul – qaladaǵy beınebaqylaý quraldary endi adamnyń bet-júzin anyqtap, onyń júris-turysyna taldaý jasap, kóshedegi kólikti de esepke alady degen sóz. Mundaı ozyq tehnologıalar túrli zańsyzdyqtyń aldyn alýǵa múmkindik beredi, sol arqyly qoǵamdyq tártipti nyǵaıta túsedi", - dedi ol.