Memleket basshysy Qasym-Jomart Toqaev qūqyq qorǵau organdarynyń keńeıtílgen alqa májílísínde ınternet jáne telefon alayaqtyǵynyń aldyn alu máselesíne arnaıy toqtaldy, - dep habarlaıdy aqshamnews.kz tílshísí.
Toqaev qylmystyń būl túrí búkíl álemde beleń alǵanyn alǵa tartty.
"Kóbíne mūndaı íske tyńǵylyqty ūıymdasqan qylmystyq toptar barady. Olar shetelden áreket etetíndíkten, tergeu amaldaryn qıyndatady. Sondyqtan būl rette aldyn alu sharalarynyń mání zor.
Ótken jyly Ūlttyq bank janynan zamanauı antıfrod-ortalyq ashyldy. Olar kúmán tudyrǵan operatsıyalardy anyqtap, būǵattap otyrady.
Sonymen qatar ózderíne tıesílí ınfraqūrylymdy paıdalana otyryp jasalǵan alayaqtyq úshín bankter men ūyaly baılanys operatorlaryna da jauapkershílík belgílep jatyrmyz.
Azamattarymyzdyń jeke málímetteríníń senímdí jerde saqtaluyn qamtamasyz etu óte mańyzdy. Halyqtyń qarjylyq sauatyn arttyryp, qoǵamda alayaqtardyń áreketteríne ımmunıtet qalyptastyru úshín barlyq deńgeıdegí deputattarmen bírlesken jūmysty kúsheıtken jón.
Alayaqtar aqshany jylystatatyn nemese syrtqa shyǵaratyn qūıtyrqy aılalaryna adamdardy aldap túsíredí. Būl da úlken problemaǵa aınaldy. Azamattarymyz paıdaǵa kenelemíz dep olarǵa bank esepshottaryn beríp qoyady. Bíraq būl áreketteríníń saldary qandaı auyr bolatynyn oılaı bermeıdí. Sońǵy bír jarym jylda 50 myńnan astam adam osyndaı jaǵdaıǵa dushar boldy. Ókíníshke qaraı, olardyń basym bólígí – jastar. Būl máselege qatysty shūǵyl shara qabyldau kerek. Qarjy naryǵyn retteu jáne damytu agenttígí banktermen bírge osyndaı shottardy aldyn ala anyqtap, būǵattaıtyn tıímdí júıení jolǵa qoıǵany jón.
Atalǵan máseleníń bír ūshy baqylausyz sım-karta aınalymyna kelíp tíreledí. Tek bıyldyń ózínde sım-kartalardy basqa bíreudíń atyna rásímdegen 100 myńǵa juyq faktí anyqtaldy. Nómírlerdí túrlí qylmystyq maqsatqa paıdalanady.
Úkímetke uákílettí organdarmen bírlese sım-kartalardy satu tártíbín retteudí jáne olardy taratqany úshín mobıldí operatorlardyń jauapkershílígín kúsheıtudí tapsyramyn", - dedí ol.