Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde polıseıler men memlekettik qyzmetkerlerdi quttyqtady, - dep habarlaıdy aqshamnews.kz tilshisi.
Prezıdent búgin elimizde Polısıa kúni jáne Memlekettik qyzmetshi kúni atalyp ótetinin aıtyp, olardy quttyqtady.
"Memleketke qyzmet etý – eń qurmetti ári asa jaýapty mindet. Sizder zań men tártipti saqtaýǵa jáne azamattardyń quqyǵyn qorǵaýǵa zor úles qosyp júrsizder. Qazir dúnıe júzi almaǵaıyp, bulyńǵyr, ıaǵnı, óte kúrdeli kezeńdi bastan ótkerip jatyr. Osyndaı qubylmaly ýaqytta qoǵamdyq qaýipsizdikti saqtaý, zańnyń múltiksiz oryndalýyn qamtamasyz etý – aıryqsha mańyzdy mindet. Sol sebepti búgin biz alǵash ret osyndaı qurammen jınalyp otyrmyz. Quqyq qorǵaý júıesindegi barlyq jaýapty qurylymdar jumyla jumys isteýi qajet", - dedi Prezıdent.
Sondaı-aq, ol elimizde "Zań men tártip" qatań saqtalýyna qoǵam ókilderiniń qosar úlesi de orasan zor ekenin eske saldy.
"Qazir osy jıynǵa ortalyq jáne jergilikti atqarýshy organ basshylary, depýtattar, sarapshylar jáne belsendi azamattar qatysyp otyr. Kúshtik qurylymdardy jańǵyrtý isinde jańa býynnyń atqaratyn róli erekshe. Sol sebepti, búgingi basqosýǵa akademıalardyń kýrsanttary da arnaıy shaqyryldy. Transulttyq qylmystyq toptarmen kúresý úshin halyqaralyq yntymaqtastyqty damytý óte mańyzdy. Osy jerde búgin sheteldik polısıa attasheleri otyr. Quqyq qorǵaý organdarymen júrgizip jatqan halyqaralyq yntymaqtastyq jumysy úshin sizderge erekshe rızashylyǵymdy bildiremin", - dedi Toqaev.