Ózekti máseleler jóninde pikir almasty.
Memleket basshysy Qasym-Jomart Toqaev Astanaǵa resmı saparmen kelgen Lıtva Respýblıkasynyń Syrtqy ister mınıstri Gabrıelús Landsbergısti qabyldady, dep habarlaıdy Almaty-akshamy.kz Aqordaǵa silteme jasap.
Kezdesý barysynda saýda-ekonomıkalyq jáne ınvestısıalyq yntymaqtastyqty nyǵaıtýǵa basa mán berile otyryp, Qazaqstan men Lıtva qarym-qatynastaryn damytý perspektıvalary, sondaı-aq halyqaralyq uıymdar aıasyndaǵy is-áreket máselesi talqylandy.
Qasym-Jomart Toqaev Gabrıelús Landsbergıske iltıpat bildire otyryp, Lıtva elimizdiń Baltyq jaǵalaýy aımaǵy men Eýropalyq Odaqtaǵy basymdyqqa ıe seriktesi ekenin atap ótti.
Kezdesýde úkimetaralyq yntymaqtastyqty jáne eki eldiń isker toptary arasynda kólik, logıstıka, qurylys jáne óńdeý ónerkásibi salalaryndaǵy is-áreketti jandandyrýdyń mańyzdylyǵy sóz boldy.
Óz kezeginde Gabrıelús Landsbergıs Qasym-Jomart Toqaevqa, Lıtva Prezıdenti Gıtanas Naýsedanyń júrekjardy sálemin jáne izgi tilegin jetkizdi. Sonymen qatar Lıtva Qazaqstandy Ortalyq Azıadaǵy jetekshi saýda-ekonomıkalyq seriktes retinde qarastyratynyn atap ótti.
Budan bólek, olar halyqaralyq kún tártibindegi ózekti máseleler jóninde pikir almasty.