Almaty qutqarýshylary qys maýsymynda qalanyń sý qoımalarynda reıd júrgizýde
Óńirlik komýnıkasıalar qyzmetiniń brıfıńinde Almaty qalasy TJD Azamattyq qorǵanys basqarmasynyń basshysy Isqar Savazov qys maýsymyndaǵy qaýipsizdiktiń negizgi erejelerin eske saldy, dep habarlaıdy Almaty-akshamy.kz.
Aýa temperatýrasynyń tómendeýinen sý qoımalarynda muz paıda bolady, biraq ol adam salmaǵyn kótere almaıdy. Jyl saıyn juqa muz adamdardyń ólimine sebep bolyp jatady.
Spıker qys mezgilinde sý aıdyndarynda adamdardyń qaza bolýyna baılanysty tótenshe jaǵdaılardyń aldyn alý maqsatynda aýdandyq tótenshe jaǵdaılar basqarmalarymen, aýdan ákimdikterimen birlesip, «Abaılańyz, juqa muz!» «Balyq aýlaýǵa tyıym salynady!» sıaqty tyıym salatyn 22 belgi ornatqanyn atap ótti. Sonymen qatar, ótken kúzgi-qysqy kezeńde 120 reıd júrgizilip, 1500-ge jýyq jadynama taratyldy.
«Balyq aýlaıtyn dúkender men balyq aýlaý quraldary satylatyn oryndarda 300-den astam jadynamalar taratyldy. Kún saıyn halyq kóp jınalatyn bilim berý, densaýlyq saqtaý nysandarynda (SOSO, saýda úıleri, halyqqa qyzmet kórsetý ortalyǵy, vokzal, áýejaı, metropolıten), sondaı-aq Almaty qalasynyń jol boıynda ornatylǵan barlyq smart taqtalar men LED-ekrandarda «Abaılańyz, juqa muz!» taqyrybynda beınerolıkter kórsetiledi», - dedi I.Savazov.
Sondaı-aq, I.Savazov kún saıyn memlekettik jáne orys tilderinde kúnine eki ret «Radıo Sıtı» jáne «Narodnoe Radıo» arnalarynda taqyryptyq aýdıojazba taratylǵanyn, «Almaty» telearnasynda beınerolıkter kórsetilgenin aıtty. Qalalyq bilim basqarmasymen birlese otyryp, qys mezgilindegi tótenshe jaǵdaılardyń aldyn alýǵa, sondaı-aq úsik shalǵanda alǵashqy medısınalyq kómek kórsetýge mashyqtandyrýǵa baǵyttalǵan ınteraktıvti sabaqtar ótkizildi.
Almaty qalasynyń Tótenshe jaǵdaılar boıynsha departamenti qys maýsymynda qaýipsizdiktiń negizgi erejelerin eske saqtaýǵa keńes beredi:
- Muzǵa qarańǵy kezde jáne nashar kórinetin kezde shyqpańyz;
- sý aıdyndarynyń qorshalmaǵan jáne qorǵalmaǵan jerlerinen ótýge nemese kólikpen júrýge tyıym salynady;
- balyq aýlaý úshin nemese basqa maqsatta muzdy tesýge, oıýǵa tyıym salynady;
- muz ústine jalǵyz shyqpańyz;
- muzdyń qattylyǵyn aıaqpen teksermeńiz;
- abaı bolyńyzdar, qar astynda jylym, jaryqtar nemese tesikter bolýy múmkin;
- eger astyńyzda muz jarylyp, jaryqtar paıda bolsa, qorqyp, qaýipten qashýdyń qajeti joq, muzdyń ústine baıaý jatyp, qaýipsiz jerge domalaý kerek;
- eger jylymǵa tússeńiz, úreıge boı aldyrmańyz, muz ústine qoldaryńyzdy keńinen ashqan kúıi jyljyńyz;
- qutqarý kezinde jyldam ári sheshimdi túrde, biraq barynsha baıqap áreket etińiz. Qutqarýshy quraldy 3-4 metrlik qashyqtyqtan berińiz.