Fransıa buǵan deıin el ekonomıkasyna 18,7 mıllıard dollarǵa jýyq ınvestısıa salǵan.
Memleket basshysy Fransıa Prezıdentiniń Astanaǵa alǵashqy sapary ekijaqty qarym-qatynasty damytýǵa tyń serpin beretinin jáne kópjaqty yntymaqtastyqty múlde jańa deńgeıge shyǵarýǵa múmkindik jasaıtynyn atap ótti, dep habarlaıdy Almaty-akshamy.kz Aqordaǵa silteme jasap.
«Fransıa – Qazaqstannyń Eýropa Odaǵyndaǵy mańyzdy ári senimdi seriktesi. Byltyr ózara taýar aınalymy 30 paıyzǵa ósip, 4 mıllıard dollarǵa jetti. Bıylǵy segiz aıda ekijaqty saýda-sattyq kólemi ótken jylmen salystyrǵanda 21 paıyzǵa artty, ıaǵnı 2,7 mıllıard dollardy qurady», – dedi Prezıdent.
Memleket basshysynyń aıtýynsha, Fransıa buǵan deıin el ekonomıkasyna shamamen 18,7 mıllıard dollarǵa jýyq ınvestısıa salǵan. Energetıka, qurylys, aeroǵarysh, farmasevtıka, taý-ken jáne hımıa ónerkásibi, mashına jasaý salalarynda birlesken jobalar júzege asyrylyp jatyr.
Osy rette Qasym-Jomart Toqaev Emmanúel Makronnyń ózara tıimdi qarym-qatynastardy damytýǵa qosqan jeke úlesin erekshe atap ótip, eki el halyqtarynyń ıgiligi jolyndaǵy yntymaqtastyqty odan ári nyǵaıtýǵa Qazaqstannyń daıyn ekenin jetkizdi.
Kelissóz barysynda taraptar jasyl energetıka, logıstıka, tranzıt, aýyl sharýashylyǵy, densaýlyq saqtaý, sıfrlandyrý jáne bilim berý salalaryndaǵy aldaǵy yqpaldastyqtyń basym baǵyttaryn aıqyndady.
Memleket basshysy mádenı baılanystardy damytýǵa erekshe nazar aýdaryp, fransýz mádenıeti men tilin Qazaqstanda ilgeriletý qajet ekenin aıtty.