Megapolıs basshysy Prezıdentke Almatynyń áleýmettik-ekonomıkalyq damýynyń aldyn ala qorytyndysy týraly esep berdi.
Memleket basshysy Almaty qalasynyń ákimi Erbolat Dosaevty qabyldady, dep habarlaıdy aqshamnews.kz Aqordaǵa silteme jasap.
Erbolat Dosaev:
bıylǵy birinshi jartyjyldyqtaǵy Almaty qalasynyń áleýmettik-ekonomıkalyq damýynyń aldyn ala qorytyndysy týraly baıandady:
– atalǵan kezeńde Almatyda ınvestısıalyq órkendeýdiń joǵary qarqyny baıqalady. Negizgi kapıtalǵa salynǵan ınvestısıa kólemi 15,8 paıyzǵa ósip, 714,8 mıllıard teńgege jetti;
– jeke ınvestısıanyń kólemi 21,1 paıyzǵa ulǵaıdy, onyń ishinde IT-sektorda, sondaı-aq týrızm, óńdeý ónerkásibi, densaýlyq saqtaý jáne kólik salalarynda ósim bar;
– jyl sońyna deıin 2 trıllıon teńge ınvestısıa tartylady dep josparlanyp otyr;
– 2024 jyldyń basynan beri 32,7 myń jumys orny ashyldy. Onyń 75 paıyzy turaqty jumys orny.
qoǵamdyq kólikti jańartý men ekologıalyq talaptarǵa sáıkestendirý boıynsha qabyldanyp jatqan sharalar týraly málimet berdi:
– bıyl ekologıalyq taza qoǵamdyq kóliktiń úlesi 70 paıyzǵa deıin artady. Byltyr bul kórsetkish 53,7 paıyzdy quraǵan;
– jergilikti búdjet esebinen jyl sońyna deıin gazben júretin 600 avtobýs, 100 elektrli avtobýs, 112 troleıbýs satyp alynady. Sondaı-aq qalanyń troleıbýs parki tolyǵymen jańartylady.
qalanyń joǵarǵy bóligin sýmen qamtýdyń rezervtik sqemasyn jasaý jónindegi tapsyrmasynyń oryndalýy týraly baıandady:
– bul baǵyttaǵy qurylys jumystary bıylǵy shilde aıynda aıaqtalyp, 6 jańa uńǵyma jáne 1,5 shaqyrym magıstraldyq qubyr paıdalanýǵa berildi. Nátıjesinde qosymsha sqemanyń qýaty 60 paıyzǵa artty. Bul Medeý aýdanynyń 50 myń turǵynyn sýmen úzdiksiz qamtamasyz etýge múmkindik beredi.
áleýmettik ınfraqurylymdy damytýǵa erekshe kóńil bólinetinin aıtty:
– bıyl 4 medısınalyq-sanıtarlyq alǵashqy kómek ortalyǵynyń qurylysy jáne 12 emhananyń kúrdeli jóndeý jumystary aıaqtalady;
– jyl sońyna deıin 11 jańa medısınalyq-sanıtarlyq alǵashqy kómek ortalyǵy men emhana qurylysynyń jobasy jasalady;
– osy jyly maýsym aıynda Almaty qalasynyń Perınatologıa jáne balalar kardıohırýrgıasy ortalyǵynda «Fetaldi hırýrgıa» pılottyq jobasy júzege asty. Bul joba elimizde alǵash ret qolǵa alynyp otyr.
mektepterdegi oryn tapshylyǵyn azaıtý baǵytynda júrgizilip jatqan jumystar jóninde aıtty:
– jyl sońyna deıin jergilikti búdjet esebinen 3,7 myń oryndyq 8 nysan paıdalanýǵa beriledi. Sonymen qatar 6,4 myń oryndyq 10 jekemenshik mektep ashylady.
Prezıdent Qasym-Jomart Toqaev óńdeý ónerkásibin damytýǵa, sondaı-aq Almaty ekonomıkasyn ártaraptandyrý aıasynda shaǵyn jáne orta bıznes úlesiniń ósýi esebinen kiristi odan ári arttyrýǵa basa nazar aýdarýdy tapsyrdy.