Prezıdent Petr Fıalanyń elimizge sapary ekijaqty qatynastardy nyǵaıtýǵa yqpal etetinine senim bildirdi.
Qasym-Jomart Toqaev Qazaqstanǵa resmı saparmen kelgen Chehıa Respýblıkasynyń Premer-mınıstri Petr Fıalany qabyldady, dep habarlaıdy Almaty-akshamy.kz Aqordaǵa silteme jasap.
«Siz elimizge úlken bıznes-delegasıa alyp keldińiz. Eki el arasyndaǵy iskerlik baılanystar men yntymaqtastyqty ilgeriletýge paıdasy óte zor bıznes forým ótedi», – dedi Qasym-Jomart Toqaev.
Kezdesý barysynda saýda-ekonomıkalyq jáne ınvestısıalyq yntymaqtastyqty, sonyń ishinde kólik-logıstıka salasyn nyǵaıtý perspektıvalaryna basa mán berildi. Prezıdent cheh ınvestorlaryna jan-jaqty qoldaý kórsetýge daıyn ekenin aıtty.
«Chehıa Respýblıkasynan energetıka, mashına jasaý, kólik, aýyl sharýashylyǵy, qarjy, medısına ónerkásibi jáne farmasevtıka sekildi ekonomıkanyń túrli salalaryna quıylatyn ınvestısıany quptaımyz. Sondaı-aq elderimizdiń astanalary arasynda tikeleı áýe qatynasyn ashamyz dep senemiz», – dedi Memleket basshysy.
Petr Fıala Chehıanyń elimizben aradaǵy yntymaqtastyqty odan ári damytýǵa nıetti ekenin rastady.
«Chehıa Respýblıkasy Qazaqstanmen burynnan dostyq qarym-qatynas ornatqan jáne ony jalǵastyramyz dep senemiz. Osy kezdesýimiz belsendi baılanystarǵa tyń serpin beredi dep úmittenemin. Qazaqstan – biz úshin óte mańyzdy seriktes. Qazaqstan men Chehıa Respýblıkasynyń yntymaqtastyǵy Eýropalyq Odaq pen Ortalyq Azıa elderi arasyndaǵy qarym-qatynastardyń asa mańyzdy tireginiń biri sanalady», – dedi Chehıa Premer-mınıstri.