Ulttyq Olımpıada komıteti boksshylardyń Tokıoda kórsetken ónerine baǵa berdi
Ulttyq Olımpıada komıteti bas assambleıasynyń otyrysynda komıtettiń bas hatshysy Andreı Krúkov boksshylardyń Tokıodaǵy sátsizdigine baǵa berdi, dep habarlaıdy almaty-akshamy.kz inform.kz silteme jasap.
«Bokstan ulttyq qurama komanda Rıo oıyndarynyń aldynda AQSH-ta daıyndalyp, Vasılıı Levıt pen Danıar Eleýsinov sıaqty úzdikter arnaıy baǵdarlama boıynsha jattyqqan edi. Bul baǵdarlamaǵa tipti búdjetten tys qarajat bólingen bolatyn. Boksshylar arasynda sońǵy bir jylda eshbir jarystyń bolmaýy olımpıada sıkline daıyndyqty nasharlatty. Tokıo Olımpıadasynyń nátıjesi ulttyq birinshilikterinde báseke óte joǵary iri elder ǵana jarys tájirıbesin ishki jaǵdaıda qamtamasyz ete alǵanyn kórsetti», - dedi Andreı Krúkov.
Onyń aıtýyna qaraǵanda, ishki chempıonattyń deńgeıi AQSH sportshylaryna - jeńil atletıkada, boks pen gımnastıka salasynda, Japonıa sportshylaryna - dzúdoda, Ońtústik Koreıa sportshylaryna - sadaq atý men semserlesýde tabysty óner kórsetýge múmkindik bergen.
«Bizge Azıa elderiniń pandemıa kezinde bir-birinen oqshaý qalǵany da keri áserin tıgizdi. Al Eýropa elderinde ózara qatynaý múmkindigi boldy. Osylaısha sportshylar kúntizbesin ózgerissiz qaldyryp, jarys praktıkasyn qajetti mólsherde ala bildi. Taldaý júrgize kelip, sarapshylar jarys praktıkasynyń bolmaýynan bólek, ulttyq qurama músheleriniń moraldyq-psıhologıalyq daıyndyǵy álsiz bolǵanyn aıtty. Ásirese jeke sport túrlerinde solaı bolǵan. Daıyndyq jattyǵýlarynyń jabyq jaǵdaıda ótýi jalǵyz daıyndalatyn sportshylardyń psıhologıalyq kóńil-kúıine áser etken. Bapkerlerdiń qatelesken tusy da boldy. Biraq oǵan kóp jaǵdaıda pandemıa shekteýinen jol tabý áreketteri sebepker bolǵan», - dedi komıtettiń bas hatshysy.