«QazMunaıGaz» UK» AQ munaı óńdeý jáne munaı hımıasy departamentiniń dırektory Makeev Dmıtrıı Pavlodar munaı óńdeý zaýytyn jóndeýge qatysty túsinik berdi, dep habarlaıdy almaty-akshamy.kz
Aıta keteıik, bıylǵy 1 qazannan bastap Pavlodar munaı-hımıa zaýyty josparly jóndeý jumystaryna toqtaıdy.
«Úsh munaı óńdeý zaýytynda dızel otynyn óndirýdiń aǵymdaǵy kólemi táýligine 16 myń tonna shamasynda. Sonymen birge, elimizde dızel otynyn tutynýdyń óte joǵary deńgeıi saqtalyp otyr, ıaǵnı táýligine 16,5 myń tonna. 1 qazanda Pavlodar zaýyty josparly jóndeýge toqtaıdy. Osy oraıda Atyraý jáne Shymkent munaı óńdeý zaýyttarynyń dızel otynyn táýliktik óndirý kólemi 9,5 myń tonnaǵa jýyq. Qazan aıynda Atyraý zaýyty 133 myń tonna, al Shymkent zaýyty 161 myń tonna dızel otynyn óndiredi. Pavlodar munaı óńdeý zaýyty jóndeýge toqtaǵanǵa deıin kásiporynda 27 myń tonna kóleminde qor jınaqtalady. Sonymen qatar, AI-92 benzıni boıynsha 45 myń tonna jáne AI-95-ke qatysty 2 myń tonna mólsherinde qor jasalady» - dedi D. Makeev Ortalyq komýnıkasıalar qyzmetinde.
Onyń sózine qaraǵanda, Pavlodar munaı-hımıa zaýytyn iske qosý bıylǵy qazan aıynyń sońyna deıin bolady. Taýarlyq dızel táýligine 6 myń tonna kóleminde 28 qazannan bastap jóneltile bastaıdy.
«Pavlodar zaýytynda kúrdeli jóndeý jumystary 2018 jyldan beri júrgizilmedi. Otandyq munaı óńdeý zaýyttarynda aǵymdaǵy jóndeý jyl saıyn ótkizilse, kúrdeli jóndeý 3 jylda bir ret atqarylady», - dedi «QazMunaıGaz» kompanıasynyń ókili.