2024 jylǵy 28 qarashada QR Prezıdenti janyndaǵy Ortalyq komýnıkasıalar qyzmetinde «Gazben jabdyqtaý júıeleri obektileriniń qaýipsizdigin qamtamasyz etý týraly» taqyrybynda baspasóz konferensıasy ótti.
Spıker bolyp QR TJM Ónerkásiptik qaýipsizdik komıteti tóraǵasynyń mindetin atqarýshy Dýbaev Rashıd Kúltaıuly sóz sóıledi, dep habarlaıdy aqshamnews.kz.
Rashıd Kúltaıuly gaz jabdyqtaý júıelerin paıdalaný kezinde qaýipsizdikti qamtamasyz etý ónerkásiptik qaýipsizdik salasyndaǵy memlekettik saıasattyń eń mańyzdy basymdyqtarynyń biri bolyp tabylatynyn atap ótti. Basty mindet – gazdyń úzdiksiz jáne qaýipsiz jetkizilýin qamtamasyz etý, aǵyp ketý, apattar jáne adamdardyń ómirine qaýip tóndiretin jaǵdaılardy barynsha azaıtý. Bul ınfraqurylymdy jańartý, júıeli tekserister júrgizý, qatań standarttardy saqtaý, sondaı-aq mamandar men azamattardy oqytý jáne habardar etý sıaqty keshendi tásildi talap etedi.
Búgingi tańda elimizdiń gazıfıkasıa deńgeıi 59%-dy quraıdy, ıaǵnı 11,6 mıllıon adam gazben qamtamasyz etilgen. Ásirese batys jáne ońtústik aımaqtarda gazıfıkasıa deńgeıi jaqsy damyǵan, alaıda Soltústik Qazaqstan, Pavlodar jáne Abaı oblystarynda gazıfıkasıa deńgeıi tómen bolyp otyr.
«Gazben jabdyqtaý salasyndaǵy apatqa baılanysty sońǵy statısıka alańdaýshylyq týǵyzýda. Oqıǵalardyń negizgi úlesi jylytý kezeńine tıesili: jaǵdaılardyń 70% — gaz balondaryna baılanysty problemalar, 25% — ýly gazben ýlaný jáne 5% - basqa oqıǵalar. Jylytý kezeńinde kóptegen turǵyndar turmystyq balondardy kóshede saqtaıdy, keıin olardy suıytylǵan kómirsýtek gazynyń tolyq býlanýyn kútpesten úılerine kirgizip, gaz jabdyqtaryna qosady, bul apat qaýpin edáýir arttyrady», - dep QR TJM Ónerkásiptik qaýipsizdik komıteti tóraǵasynyń mindetin atqarýshy Rashıd Dýbaev atap ótti.
2024 jyly TJM Ónerkásiptik qaýipsizdik komıtetiniń ınspektorlary gazben jabdyqtaý obektilerine 40 tekserý júrgizdi, 479 buzýshylyq anyqtaldy, 12 ákimshilik quqyq buzýshylyq týraly is qozǵaldy, 12 nysannyń jumysy toqtatyldy. 2022-2023 jyldary 190-nan astam tekserý júrgizildi, 1000-nan astam buzýshylyq anyqtalyp, 31 is qozǵaldy.
Gaz júıelerin tıimdi jáne qaýipsiz paıdalaný úshin memleket tarapynan baqylaý ǵana emes, profılaktıkalyq is-sharalar men turaqty tekserýler júrgizý de mańyzdy. Bıyl turǵyn aýdandarda 500-den astam aralaý uıymdastyryldy, ásirese erekshe nazar aýdarýdy qajet etetin áleýmettik ınfraqurylym men jeke úıler tekserildi. Sonymen qatar gazben jabdyqtaýshy uıymdardyń qatysýymen 80-nen astam keńes ótkizilip, áleýmettik jelilerde 800-den astam materıaldar jarıalandy.
QR TJM Ónerkásiptik qaýipsizdik komıteti tóraǵasynyń mindetin atqarýshy Rashıd Dýbaev sóz sońynda gaz jabdyqtary men turmystyq gaz balondaryn paıdalaný kezindegi negizgi qaýipsizdik sharalaryn atap ótti.