Janat AITİLEÝ, Qala qurylysy keńesiniń múshesi:
Saraptamalyq qaýymdastyqpen birlese kele, qala qurylysy reglamentiniń jobasy qoǵamdyq talqylaýǵa tústi.
Almatynyń 2040 jylǵa deıingi Bas josparyn iske asyrý aıasynda qala ákimdigi jańa qala qurylysy reglamentin ázirledi. Qujat jobasy «Ashyq NQA» saıtynda ornalastyrylǵan, jarıa talqylaýǵa árkez ashyq. Álbette, qala qurylysy reglamentiniń bazalyq normasy jeldi aýmaqtyń jańartylǵan kartasyn, turǵyn úı ǵımaratynyń bıiktiginiń naqty parametrin bekitýdi, bıznesti damytýǵa qajet turǵylyqty aýdandaǵy birinshi qabatty paıdalaný mindettiligi men basqa da máselelerdi kózdeıdi.
Sapaly qala qurylysy reglamentin ázirleý men qabyldaý – mańyzdy áleýmettik ári ákimshilik mindettiń biri. Olaı bolsa, munyń naqty sheshimi qysqa merzimde Almaty qalasynyń turǵyndaryna áleýmettik, ekonomıkalyq, saıası jáne qoǵamdyq paıda ákelmek. Demek, bul jaǵdaı qalamyzǵa jaqyn barlyq óńirde eksponensıaldy ekonomıkalyq ósýdiń mýltıplıkatıvtik áserimen turaqty uzaq merzimdi damýdyń negizin qalaýǵa qabiletti.
«Dóńgelek ústel» úrdisindegi bul basqosýda sarapshylar jańa qala qurylysy reglamentine baılanysty ózekti máselelerdi talqylady. Olardyń pikiri men usynysy qalalyq ınfraqurylym men halyqtyń qajettiligindegi qarqyndy ózgeris jaǵdaıynda erekshe mánge ıe. Atap aıtqanda, talqylaýdyń mańyzdy aspektisi – ekologıalyq normany, seısmıkalyq qaýipsizdikti saqtaý men jaıly qalalyq ortany qurý qajettiligi.
«Qala qurylysy reglamentiniń jobasyna qatysty qoǵamdyq talqylaýda túıtkildi biraz másele qamtyldy. Kózdegen maqsat – qala qurylysy reglamentiniń bazalyq normalarynyń qatań saqtalýy. Osyǵan deıin de aıtqanymyzdaı, qalamyzdyń ál Farabı dańǵylynyń boıyna 18-20 qabatty úıler boı kótergen. Endigi maqsat – atalǵan dańǵyl boıyna bıiktigi 12 metrden (3 qabat) aspaıtyn úıler ǵana salý. Ál Farabı men Abaı dańǵyldary aralyǵynda salynatyn ǵımarattardyń bıiktigi 25 metrden (9 qabat) aspaýy tıis. Osyndaı qaǵıdat qatań saqtalýy qajet. Qalamyzdyń bolashaǵy, turǵyndardyń qaýipsizdigi bizge ınvestorlardyń talabynan mańyzdy, – deıdi Qala qurylysy keńesiniń múshesi Janat Aıtileý.